შინაგან საქმეთა სამინისტროში 1 ივნისიდან სრულად ამოქმედდება „სისტემური მონიტორინგის” ახალი სამმართველო — ეს განაცხადა სამინისტროს წარმომადგენელმა დარახველიძემ. მისი თქმით, ახალი სტრუქტურის „მთავარი ფუნქცია სიძულვილის ენის ფაქტების გამოვლენა და შესაბამისი სამართლებრივი რეაგირება” იქნება.

„ქართული ოცნების” მთავრობაში ახლად დანიშნულმა მამუკა მდინარაძემ 18 მაისს განაცხადა, რომ ეს სამმართველო „საჯარო სივრცეში სიძულვილის ენის, შეურაცხმყოფელი კამპანიებისა და აგრესიული კომუნიკაციის სისტემურ მონიტორინგს” განახორციელებს. სამინისტრო სოციალურ ქსელებში გამოქვეყნებულ პოსტებს, ფოტოებს, კომენტარებსა და ვიდეოებს შეისწავლის.

რა ჩაითვლება დარღვევად

დარახველიძის განმარტებით, „პიროვნული თავდასხმები” დაცულ გამოხატვაში ვერ მოქცევა — კერძოდ, ნებისმიერი კრიტიკა ან ვულგარული გამოხატვა, „თუ ლახავს კონკრეტული ადამიანის პირად ღირსებას.” თუმცა, მისივე განმარტებით, ხელი არ შეეხება „დაცულ გამოხატვას”: „თუ ადამიანი უხამსი გამონათქვამებით რაიმე პოლიტიკას ან კონკრეტულ საზოგადოებრივ მოვლენას აკრიტიკებს და არა კონკრეტულ ადამიანს — ეს გამოხატვის თავისუფლებაა.” ზღვარი, მისი თქმით, „გადის პიროვნულ თავდასხმებზე.”

სამმართველოში კადრები ძირითადად სამინისტროს სხვა დანაყოფებიდან „გამოცდილი” თანამშრომლებით დაკომპლექტდება.

„ქართული ოცნების” კრიტიკოსები და უფლებადამცველები ამ ინიციატივას „ცენზურის მექანიზმს” უწოდებენ — მათი შეფასებით, ხელისუფლება „სიძულვილის ენასთან ბრძოლის” ბრენდინგის ქვეშ ოპოზიციური გამოხატვის ჩახშობას ახდენს.