ფოთის რკინიგზის სადგურზე მატარებლის ვაგონის ავზიდან 3 000-მდე ლიტრი საწვავი ფარულად გამოიტაცა — სამეგრელო-ზემო სვანეთის პოლიციამ ბრალდებული დიდი ოდენობით ქურდობის მუხლით დააკავა. ამის შესახებ შინაგან საქმეთა სამინისტრომ განაცხადა.

გამოძიებით დადგინდა, რომ ბრალდებულმა სადგურის ტერიტორიაზე ვაგონის ავზზე ფარულად ჩამონტაჟებული მილის მეშვეობით საწვავი სისტემატურად გამოიტაცა. სამართალდამცველებმა დანაშაულის ჩამდენი პირი ბრალდებულის სახით დააკავეს და ნაქურდალი საწვავი ნივთმტკიცებად ამოიღეს.

„შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის ფოთის საქალაქო სამმართველოს თანამშრომლებმა, დიდი ოდენობით ჩადენილი ქურდობის ბრალდებით ერთი პირი დააკავეს”, — ნათქვამია სამინისტროს განცხადებაში.

გამოძიება სისხლის სამართლის კოდექსის 177-ე მუხლის მე-2 და მე-4 ნაწილებით მიმდინარეობს, რაც 10 წლამდე პატიმრობას ითვალისწინებს. სამართალდამცველები ამჟამად დანაშაულში სხვა მონაწილე პირების დასადგენად და დასაკავებლად მუშაობენ.