საქართველოს ახალი პატრიარქი შიო III-მ ინტრონიზაციის შემდეგ პირველ ქადაგებაში ეკლესიის მომავლის ხედვა გაიზიარა — ისაუბრა ეკლესიის გახსნაზე, ახალგაზრდებთან მიახლოებაზე და ილია II-ის დიდი საქმის გაგრძელების ვალდებულებაზე.

„თანამედროვე ცხოვრება ახალი სირთულეების წინაშე გვაყენებს — ადამიანთა გულები გაუცხოებული და გაციებულია. ათასგვარი საცდური ანაცვლებს რწმენას, ზნეობრივ ფასეულობებს, ოჯახს. ამიტომ ერთიორად მძიმეა ეკლესიის მწყემსმთავრობის ტვირთი”, — თქვა პატრიარქმა.

ეკლესიის კარი ყველასთვის

„საჭიროა ფართოდ გავუღოთ ეკლესიის კარი ყველას — მხოლოდ ტაძრის ამბიონთან ნუ დავუცდით მოყვასის მოსვლას. ტაძრის კედლებს მიღმაც შევეტკბოთ ჩვენს სულიერ შვილებს, რომლებიც, ვინ იცის, უძღებ შვილთა მსგავსად ვერ ბედავენ ჩვენამდე მოსვლას”, — განაცხადა მან.

ახალგაზრდები — ეკლესიის პრიორიტეტი

პატრიარქმა განსაკუთრებული ყურადღება ახალგაზრდებს მიუძღვნა: „ქვეყნის ხვალინდელი დღე და ჩვენი შვილები არიან ჩვენი მომავალი — სწორედ მათ სჭირდებათ ყველაზე მეტად სიყვარული, ზრუნვა და თანადგომა. ისე უნდა ვიცხოვროთ, რომ მათთვის ღირსეულ მაგალითად ვიქცეთ.”

ილია II-ის მემკვიდრეობა

შიო III-მ ხაზი გაუსვა, რომ მათი ვალია ილია II-ის საქმის გაგრძელება. ამ კონტექსტში მან ბიბლიური პარალელი მოიყვანა — ელისე წინასწარმეტყველი ევედრებოდა, „მრჩობლი მადლი” მიეღო, ვიდრე ილია წინასწარმეტყველს, არა კონკურენციის, არამედ სასიკეთო სამსახურის სიმდაბლის გამო.

„ჩვენ ყველანი ვართ მისი ოჯახი — ის ჩვენი დიდი მამა იყო და ჩვენი ვალია, გავაგრძელოთ მისი დიდი საქმე”, — განაცხადა ახალმა პატრიარქმა.