12 მაისს სვეტიცხოვლის საკათედრო ტაძარში გაიმართა საქართველოს 142-ე კათოლიკოს-პატრიარქ შიო III-ის საზეიმო ინტრონიზაცია. ღვთისმსახურება 10:00 საათზე დაიწყო.

ახალარჩეული პატრიარქი ამ გადაწყვეტილებას ასე განმარტავდა: „ტრადიციის მიხედვით, გამორჩევის შემდეგ, პირველივე კვირას — თუ დიდ დღესასწაულს ემთხვევა — კათოლიკოს-პატრიარქმა უნდა იმსახუროს. ახლოეს ასეთ დღესასწაულს წარმოადგენს ანდრია პირველწოდებულის საქართველოში შემოსვლა და ყოვლადწმინდა ღვთისმშობლის წილხვდომილობა. ამიტომ გადავწყვიტეთ, ინტრონიზაცია 12 მაისს, სვეტიცხოვლის საკათედრო ტაძარში გაიმართება.”

სვეტიცხოველში დილიდანვე გამოცხადდნენ სამღვდელოების წარმომადგენლები, მრევლი და პოლიტიკოსები. ცერემონიაზე ესწრებოდნენ „ქართული ოცნების” ლიდერები, მათ შორის პარტიის დამფუძნებელი ბიძინა ივანიშვილი. კადრებში ჩანდა ოპოზიციის ნაწილი და სახალხო დამცველი. ტაძრის ეზოში და მის გარეთ სპეციალური ეკრანები იყო დამონტაჟებული; სატაძრო კომპლექსის მიმდებარე ტერიტორიაზე კი დიდი რაოდენობის პოლიცია იყო მობილიზებული.

ღვთისმსახურების მსვლელობისას ახალ პატრიარქს გადაეცა ეკლესიური მმართველობის სიმბოლოები: საპატრიარქო მიტრა, კუნკულ-ბარტყული (სამღვდელო თავსაბური), ჯვარ-პანაღია და კვერთხი.

12 მაისი ასევე წმინდა მოციქულ ანდრია პირველწოდებულის საქართველოში შემოსვლის ხსენებისა და ღვთისმშობლის საქართველოსადმი წილხვდომილობის დღეა.

შიო მუჯირი, სენაკისა და ჩხოროწყუს მიტროპოლიტი, 11 მაისს, გაფართოებულ საეკლესიო კრებაზე, 22 ხმით გახდა საქართველოს 142-ე კათოლიკოს-პატრიარქი.