საქართველოს ახალმა პატრიარქმა შიო III-მ „ოჯახის სიწმინდის დღეს” სამების ტაძარში შეკრებილ ხალხს გამოუცხადა: „თუ ოჯახში მძიმე ცოდვა ტრიალებს, ისეთი, როგორიც მაგალითად არის აბორტი, მაშინ ასეთ საფუძველზე ვერანაირ ბედნიერებას ვერ ააშენებს ოჯახი და განწირულია ასეთი ოჯახი.”

პატრიარქმა ბიბლიური ციტატით გააგრძელა: „მოკლულთა სისხლი ღაღადებს ღვთისადმი შურისძიებისთვის.” პირიქით კი, მრავალშვილიანი ოჯახი „ბედნიერია, რადგან ბავშვი, ღვთისგან მოვლენილი ანგელოზი, ირგვლივ ყველაფერს ათბობს.”

შიო III-მ ასევე „ქართული ოცნების” ლგბტ უფლებების შემზღუდველი კანონი შეაფასა: „უარი კი არ უნდა ვთქვათ ამ კანონმდებლობაზე, პირიქით, უნდა გავაძლიეროთ — ეს ჩვენი ქვეყნის გადარჩენის საწინდარია.”

ქალთა უფლებადამცველები დემოგრაფიული პრობლემის გადასაჭრელად აბორტის შეზღუდვის მოთხოვნებს „არასწორ გზად” მიიჩნევენ. „საფარის” ყოფილი ხელმძღვანელი ბაია პატარაია: „საქართველოში დემოგრაფიული პრობლემის სათავე სიღარიბეა. დედა გააძლიერო, მისი პირობები გააუმჯობესო — ეს არის სწორი გზა.”

„ქართული ოცნების” კანონმდებლობა, რომელიც 2024–2025 წლებში მიღებულ იქნა, კრძალავს სქესის შეცვლის სამედიცინო ჩარევებს, ლგბტ ადამიანების მიერ ბავშვის შვილად აყვანას და კრძალავს შეკრებებს, სადაც ლგბტ სიმბოლიკა ფიგურირებს.