საქართველოს მართლმადიდებელი ეკლესიის ახალმა პატრიარქმა შიო III-მ 17 მაისს, „ოჯახის სიწმინდის” შეკრებაზე, განაცხადა, რომ ოჯახი, სადაც „მძიმე ცოდვა — აბორტი — ტრიალებს”, „ბედნიერებას ვერ ააშენებს და განწირულია.”

„თუ ოჯახში მძიმე ცოდვა ტრიალებს, ისეთი, როგორიც მაგალითად აბორტია, მაშინ ასეთ საფუძველზე ვერანაირ ბედნიერებას ვერ ააშენებს ოჯახი. მოკლულთა სისხლი ღაღადებს ღვთისადმი შურისძიებისთვის,” — თქვა მან.

შიო III-მ ასევე „პირველ სამ შვილამდე” ბავშვების ყოლა „რთულ”, ხოლო შემდეგ — „ბევრად უფრო ადვილ” საქმედ დაახასიათა.

ამ განცხადებების შემდეგ პატრიარქმა „ქართული ოცნების” ლგბტ უფლებების შემზღუდველ კანონს პოზიტიურად შეაფასა: „უარი კი არ უნდა ვთქვათ ამ კანონმდებლობაზე, პირიქით — უნდა გავაძლიეროთ და განვამტკიცოთ. ეს არის ჩვენი ქვეყნის გადარჩენის, გამრავლების საწინდარი.”

ქალთა უფლებადამცველები კი ამბობენ, რომ დემოგრაფიული პრობლემების გამოსასწორებლად აბორტის შეზღუდვა „არასწორი გზაა”: „საქართველოში დემოგრაფიული პრობლემის სათავე სიღარიბეა — დედა უნდა გააძლიერო, მისი პირობები გააუმჯობესო,” — ამბობს „საფარის” ხელმძღვანელი ბაია პატარაია.

17 მაისს — ჰომოფობიასა და ტრანსფობიასთან ბრძოლის საერთაშორისო დღეს — საქართველოს მართლმადიდებელი ეკლესია „ოჯახის სიწმინდის” ღონისძიებას ატარებდა. 13 წლის წინ, სწორედ ამ დღეს ძალადობრივმა ჯგუფებმა მცირერიცხოვან ლგბტ მხარდამჭერთა ჯგუფზე თავდასხმა განახორციელეს.