სენაკის მუნიციპალიტეტის სოფელ ზანაში, ღამით, 47 წლის მერაბ ჭიჭავამ მეზობელი ქალი, თეა ხარგელია, სანადირო თოფიდან გასროლით სასიკვდილოდ დაჭრა. „ტელეკომპანია პირველის” ცნობით, ჭიჭავა მსხვერპლის ვაჟის ნათლია იყო. მოტივად ეჭვიანობა სახელდება.

„9-10 საათი იქნებოდა, ვუთხარი შვილს, რომ დასაწოლად წასულიყო. მალევე გავიგე თოფის ხმა. გარეთ გამოვედი — ქვემოთ ჩემი ქალიშვილი ეგდო, სისხლში ცურავდა. ჭიშკრის კარი ღია იყო და ვიღაც კაცი გარბოდა. შემდეგ გავიგე — ეს ჩემი შვილიშვილის ნათლია, მერაბ ჭიჭავა, იყო. ვითხოვთ მკვლელის მკაცრად დასჯას,” — განაცხადა მოკლულის მამამ.

მეზობლების ცნობით, მოკლული სამი შვილის დედა იყო. ბრალდებულის დედა კი აცხადებს, რომ ვაჟის ქმედებამ სრულიად გაოგნა: „თავად ჩაბარდა, სხვა არაფერი ვიცი.”

შინაგან საქმეთა სამინისტროს სამეგრელო-ზემო სვანეთის პოლიციამ ბრალდებული ოპერატიული ღონისძიებების შედეგად ცხელ კვალზე დააკავა. სახლიდან სანადირო თოფი ნივთმტკიცებად ამოიღეს. გამოძიება სისხლის სამართლის კოდექსის 108-ე მუხლით — განზრახ მკვლელობა, 15 წლამდე სასჯელი — მიმდინარეობს.