ორმაგი ძლიერი მიწისძვრის შემდეგ, ვენესუელაში, ჩამონგრეული შენობის ნანგრევებიდან მამაკაცი ცოცხალი ამოიყვანეს. ერნან ხილი ნანგრევებში 8 დღის განმავლობაში იყო მოყოლილი.

მაშველებმა მისი ადგილსამყოფლის დადგენიდან 100 საათზე მეტი იმუშავეს და 140 ტონა ბეტონის ქვეშ მოყოლილი მამაკაცის გადარჩენა შეძლეს.

ვენესუელის პრეზიდენტის მოვალეობის შემსრულებელმა, დელსი როდრიგესმა, ხილი საავადმყოფოში მოინახულა. მან სოციალურ ქსელში ვიდეო გაავრცელა და გადარჩენილს „ცოცხალი სასწაული“ უწოდა.

ვენესუელა ეროვნული მასშტაბის კრიზისს ებრძვის. 24 ივნისს, ადგილობრივი დროით 18:00 საათზე, ქვეყნის ჩრდილო-ცენტრალურ რეგიონში (იარაკუი/კარაბობოს შტატები) ორი ზედიზედ ძლიერი მიწისძვრა მოხდა, რომელთა სიმძლავრემ 7.2 და 7.5 მაგნიტუდა შეადგინა. ხელისუფლება იტყობინება, რომ მას შემდეგ კიდევ 890 განმეორებითი ბიძგი (აფთერშოკი) დაფიქსირდა.

სტატისტიკა მიწისძვრებიდან ერთი კვირის შემდეგ:

• 2 645 დაღუპული;
• 12 666 დაშავებული;
• 15 050-ზე მეტმა ადამიანმა დაკარგა საცხოვრებელი სახლი;
• 6 462 ადამიანის გამოყვანა მოხერხდა სტიქიის ზონიდან ცოცხალი.

ამ დროისთვის ყველაზე მეტად დაზარალებულ რეგიონად ლა-გუაირას შტატი რჩება.

ვენესუელის მთავრობა ამ ეტაპზე მთელ ძალისხმევას სამძებრო-სამაშველო ოპერაციებზე, დროებითი ბანაკების მოწყობასა და მოსახლეობის დახმარებაზე მიმართავს. პროცესში ჩართულია გაერო (UN) და მისი პარტნიორი ორგანიზაციები, რომლებიც ადგილობრივ ხელისუფლებასთან კოორდინაციით, დაზარალებულებისთვის ჰუმანიტარული დახმარების მასშტაბებს ყოველდღიურად ზრდიან.