ჯანდაცვის მინისტრი მიხეილ სარჯველაძე განაცხადა, რომ საქართველო ელოდება ევროპული ქვეყნების გადაწყვეტილებას დიუშენის კუნთოვანი დისტროფიის სამკურნალო ახალი პრეპარატების შეძენის საკითხზე.

„ველოდებით, როდის გაეცემა ყველა კითხვას მედიკამენტებთან დაკავშირებით პასუხი, როდის დაიწყებენ ევროპული სახელმწიფოები შესყიდვას. ყველამ ძალიან დიდი პასუხისმგებლობით უნდა მოეკიდოს ამ საკითხს,” — განაცხადა სარჯველაძემ.

მინისტრი ამბობს, ერთი კონკრეტული სახელმწიფოს გადაწყვეტილება ჯერ კიდევ არ ნიშნავს ევროპისთვის სრულ პასუხს — ბევრი ქვეყანა კვლავ გადაჭრის გზებს ეძებს.

სარჯველაძემ ასევე განაცხადა, რომ ახლახანს ჟენევაში მსოფლიო ჯანდაცვის ასამბლეაზე ესწრებოდა, სადაც მაღალ დონეზე ჰქონდა შეხვედრები. „იქ ევროპულ სახელმწიფოებშიც ზუსტად იგივე კითხვებს სვამდნენ და ამ კითხვებზე პასუხის გაცემამდე გადაწყვეტილებებს არ იღებდნენ,” — აღნიშნა მინისტრმა.

სარჯველაძემ ხაზი გაუსვა, რომ სამუშაო პროცესი მშობლების, პაციენტების და ყველა დაინტერესებული მხარის ჩართულობით უნდა წარიმართოს.

საქართველოში დიუშენის კუნთოვანი დისტროფიის დიაგნოზი 80-მდე ბავშვს დაუდასტურდა. ერთ თვეზე მეტია მშობლები მთავრობის კანცელარიასთან ღამისთევით ოთხი ახალი პრეპარატის — ელევიდისის, ეგზონ-სკიპინგის, ჯივინოსტატისა და ვამოროლონის — შემოტანას ითხოვენ. ამ პრეპარატებს აშშ-ის მარეგულირებელი ჰქონდა დამტკიცებული ოთხივე, ევროპამ — ორი. ხელისუფლება შემოტანაზე თანხმობას მიიჩნევს ნაადრევად.