მთავრობის ადმინისტრაციამ პარლამენტს „საჯარო დაწესებულებაში შრომის ანაზღაურების შესახებ” კანონში ცვლილება წარუდგინა. ინიციატივა შეეხება სახელმწიფო-პოლიტიკური თანამდებობის პირების ვიწრო წრეს: მინისტრთა მოადგილეებს, აფხაზეთისა და აჭარის ავტონომიური რესპუბლიკების მთავრობის წევრთა მოადგილეებს, სახელმწიფო რწმუნებულთა მოადგილეებსა და მერთა მოადგილეებს.

რა იცვლება?

მოქმედი კანონი ამ პირებს სახელფასო დანამატსა და ფულად ჯილდოს უკრძალავს — ისე, როგორც ზემდგომ სახელმწიფო-პოლიტიკურ და პოლიტიკურ თანამდებობის პირებს. ცვლილებით სახელფასო დანამატი გაიცემა ზეგანაკვეთური სამუშაოს, დამატებითი ფუნქციების, ღამის სამუშაოს ან განსაკუთრებული პირობების შემთხვევაში. ფულადი ჯილდო კი — ხანგრძლივი და კეთილსინდისიერი სამსახურის ან განსაკუთრებული სირთულის დავალების შესრულებისთვის.

ორივე — დანამატი და ჯილდო — ზემდგომი თანამდებობის პირის გადაწყვეტილებით, კანონით დადგენილი ზღვრის ფარგლებში გაიცემა.

კანონის პროექტის განმარტებითი ბარათი ამ პირებს „მნიშვნელოვანი ფუნქციის” შემსრულებლებად ახასიათებს, რომელთა „მატერიალური სტიმულირება სახელმწიფო უწყებების ეფექტიანობის გასაუმჯობესებელ მნიშვნელოვან ბერკეტს” წარმოადგენს.