საქართველოს ს. მეტრეველის სახელობის საქართველოს სუპერთასი 2026

1 ივლისი, ოთხშაბათი

მატჩი III ადგილისათვის

დილა 20:00 დინამო (თბ)

გორი. თენგიზ ბურჯანაძე

ფინალი

იბერია 1999 20:00 ტორპედო

თბილისი. მიხეილ მესხი

…საქართველოს სუპერთასის პირველი გათამაშება 1996 წლის ზაფხულში ჩატარდა და ისევე, როგორც სხვა ქვეყნებში, ამ ტიტულისთვის საქართველოს ჩემპიონი და თასის მფლობელი იბრძოდნენ.

2019 წლიდან ამ ტურნირს ლეგენდარული ქართველი ფეხბურთელის, სლავა მეტრეველის სახელი ეწოდა, ხოლო 2023 წლიდან შეიცვალა გათამაშების ფორმატი - ისევე, როგორც ესპანეთში, ამ ტიტულის მოსაპოვებლად, ჩვენთანაც 4 გუნდი იბრძვის - მოქმედი ჩემპიონისა და თასის მფლობელის გარდა, სუპერთასის მოპოვების შანსი წინა სეზონის მეორე და მესამეადგილოსნებსაც გაუჩნდათ.

სხვათა შორის, სწორედ ამ ახალი ფორმატის “გამოძახილი” იყო ის ფაქტიც, რომ 2024 წლის გათამაშებაში, სუპერთასის ფინალურ მატჩში ვერც მოქმედი ჩემპიონი (ბათუმის “დინამო”) ვიხილეთ და ვერც - თასის მფლობელი (“იბერია 1999”).

2024 წლის გათამაშება იმითაც იყო განსაკუთრებული, რომ პირველად საქართველოს სუპერთასის ისტორიაში, ორივე ფინალისტის მთავარი მწვრთნელი უცხოელი გახლდათ - სტივ კინი (“ტორპედო”) და ფერდინანდ ფელდჰოფერი (თბილისის “დინამო”).

და აი, იგივე მეორდება ახლაც: “ტორპედოს” გერმანელი თავკაცი დირკ შუსტერი თავის პირველი ქართული ტიტულის მოსაპოვებლად იბრძოლებს, “იბერია 1999-ის” ახალ მთავარ მწვრთნელს, ანდრეი დემჩენკოს (უკრაინა) კი, უკვე აქვს აქაური ტიტული (ჩემპიონობა - ბათუმის “დინამოსთან” ერთად).

…წლევანდელი გათამაშება, საიუბილეო - ოცდამეხუთეა! თუმცა, ისიც უნდა ვთქვათ, რომ სხვადასხვა დროს (1999, 2001-2004, 2011, 2016 წლებში) და სხვადასხვა მიზეზით, ეს ტურნირი, საერთოდ, არ ჩატარებულა.

…სუპერთასის ახალი ფორმატის შემოღება ერთადერთი მიზეზით იყო განპირობებული: ამ ტიტულისათვის მებრძოლი ოთხივე გუნდი მაქსიმალურ მზადყოფნაში შეხვედროდა მოახლოებულ ევროტურნირებს. სამწუხაროდ, ამ სიახლით საერთო სურათი არ შეცვლილა: ისე როგორც მანამდე, 2023 წლიდანაც მოყოლებული, ქართული გუნდების თითქმის აბსოლუტური უმრავლესობისათვის, ევროტურნირები ხომ ივლისში სრულდება…

…წლევანდელ ფინალისტებმა ერთნაირი ანგარიშით (1:0) იმარჯვეს ნახევარფინალებში: “იბერია 1999”-მა ვახო ბედოშვილის გოლით დაამარცხა თბილისის “დინამო”, ხოლო “ტორპედოს” გასვლით მატჩში (“დილასთან”), გუნდის კაპიტნის ვლადიმერ მამუჩაშვილის კარგმა საგოლე ალღომ მოაგებინა. აღსანიშნავია, რომ “ტორპედო” მეექვედ იბრძოლებს საქართველოს სუპერთასისთვის, ხოლო “იბერია 1999” (ყოფილი “საბურთალო”) - მეოთხედ.

სუპერთასის გამორჩეული ფაქტები, მოვლენები

• საქართველოს სუპერთასის გათამაშება ყველაზე მეტჯერ თბილისის მიხეილ მესხის სახელობის სტადიონზე ჩატარდა - შვიდჯერ; “დინამო არენაზე” - ოთხჯერ, ბათუმსა და თბილისის დავით პეტრიაშვილის სახელობის სტადიონზე - სამ-სამჯერ, გორსა და ქუთაისში - ორ-ორჯერ, ხოლო მარტვილსა და რუსთავში - თითო-თითოჯერ; ასევე ერთხელ გაიმართა სუპერთასის მატჩი მიხეილ მესხის სახელობის სტადიონის სათადარიგო მოედანზე.

• სუპერთასის წინა ოცდაოცხ გათამაშებაში 15 გუნდი მონაწილეობდა და დიდი დრო უნდა გავიდეს, თბილისის “დინამოს” რეკორდი რომელიმე სხვა გუნდმა რომ გააუმჯობესოს: 14 მონაწილეობა და 9 გამარჯვება! ამის შემდეგ, თანმიმდევრობა ასეთია: “ტორპედო” - 5 (3), ბათუმის “დინამო” - 5 (2), “ზესტაფონი” - 3 (2), “ჩიხურა” - 3 (1), “იბერია 1999” (ყოფილი - “საბურთალო”) - 3 (1), “დილა” - 3 (1), “ამერი” - 2 (2), რუსთავის “მეტალურგი” (იგივე - “ოლიმპი”) - 2 (1), “ვიტ ჯორჯია” - 2 (1), “გაგრა” - 2 (0), “სამტრედია” - 1 (1), “სიონი” - 1 (0), “ლოკომოტივი” - 1 (0), “სპაერი” - 1 (0).

• მწვრთნელებს შორის სუპერთასზე ყველაზე მეტი მატჩი ჩაატარეს: კახა ჩხეტიანმა (“ტორპედო” / თბილისის “დინამო”) - 4 (2), გია გეგუჩაძემ (“ზესტაფონი” / თბილისის “დინამო” / ბათუმის “დინამო”) - 4 (2), გიორგი ჭიაბრიშვილმა (“საბურთალო” / “ზესტაფონი” / თბილისის “დინამო”) - 3 (2), შოთა ჭეიშვილმა (ბათუმის “დინამო”) - 3 (1) და სოსო ფრუიძემ (“ჩიხურა”) - 3 (1);

ორ-ორჯერ მონაწილეობდნენ: გიორგი ჩიხრაძე (“ამერი”) - 2 (2), დავით ყიფიანი (თბილისის “დინამო” / “ტორპედო”) - 2 (1), კახა ცხადაძე (თბილისის “დინამო” / “სიონი”) - 2 (1), კახა კაჭარავა (თბილისის “დინამო” / “ზესტაფონი”) - 2 (1), ნოდარ აკობია (თბილისის “დინამო” / “ლოკომოტივი”) - 2 (1); თითო-თითოჯერ: მურთაზ ხურცილავა (თბილისის “დინამო”) - 1 (1), ოთარ კორღალიძე (თბილისის “დინამო”) - 1 (1), რაინერ ცობელი (თბილისის “დინამო”) - 1 (1), გელა გომელაური (“ვიტ ჯორჯია”) - 1 (1), თემურ მახარაძე (“ოლიმპი”) - 1 (1), კახა გოგიჩაიშვილი (თბილისის “დინამო”) - 1 (1), გია ცეცაძე (“სამტრედია”) - 1 (1), თემურ შალამბერიძე (“საბურთალო”) - 1 (1), გიორგი ნემსაძე (თბილისის “დინამო”) - 1 (1), სტივ კინი (“ტორპედო”) - 1 (1), დიეგო ლონგო (“დილა”) - 1 (1), ანატოლი პისკოვეცი (“ოლიმპი”) - 1 (0), ვალდას ივანაუსკასი (“დილა”) - 1 (0), მერაბ კოჭლაშვილი (“ვიტ ჯორჯია”) - 1 (0), ზვიად ჯელაძე (“გაგრა”) - 1 (0), მალხაზ ჟვანია (თბილისის “დინამო”) - 1 (0), უჩა სოსიაშვილი (“დილა”) - 1 (0), გაგა კირკიტაძე (“გაგრა”) - 1 (0), ლევან კორღალიძე (“საბურთალო”) - 1 (0), ფერდინად ფელდჰოფერი (თბილისის “დინამო”) - 1 (0), ანზორ კიღურაძე (“სპაერი”) - 1 (0).

როგორც ამჩნევთ, საუკეთესო შედეგი გიორგი ჩიხრაძეს აქვს: “ამერის” მთავარი მწვრთნელის რანგში ორჯერ გაიყვანა გუნდი სუპერთასზე და ორივეჯერ გაიმარჯვა! ვნახოთ, რომელი სპეციალისტი შეძლებს უახლოეს წლებში აქამდე ყველასათვის მიუღწეველი შედეგის ჩვენებას: საქართველოს სუპერთასის გათამაშების ისტორიაში ეს ტურნირი სამჯერ არც ერთ მწვრთნელს არ მოუგია!

აი, კახა გოგიჩაიშვილი კი ერთადერთია, საქართველოს სუპერთასი ფეხბურთელის რანგშიც რომ მოუგია და როგორც - მწვრთნელსაც;

• საქართველოს სუპერთასის წინა 24 გათამაშებაში უამრავი ლეგიონერი მონაწილეობდა: რამონი, ლეონარდო, ნათან ჟუნიორი, რენე ფერეირა, პედრო გუგა, ჯოვინო ფლამარიონი, აურო, ელიტონ ჟუნიორი, ფელიპე პირესი, ჟოაო არაუჟო (ყველა - ბრაზილია), ჩასემი, ევოჩე, ჯუისი (სამივე - კამერუნი), ოვონო, აკირემი, აკუასაგა (სამივე - გაბონი), ჩისკო, ორიოლ ლოსანო, მონხილი (ყველა - ესპანეთი), ოვონიკოკო, ჯერემია, ტეიდი (ყველა - ნიგერია), ბოტი გოა, ვუო, გი (ყველა - კოტ დ’ივუარი), ედნილსონი, პედრო მონტეირო (ორივე - პორტუგალია), კრშკო, ორშულა (ორივე - სლოვაკეთი), სპასოევიჩი, სტიეპოვიჩი, ბალიჩი (ყველა - მონტენეგრო), ინომოვი (უზბეკეთი), პეტკოვი (ბულგარეთი), იელიჩი, რადინი, მარუშიჩი, ნინკოვიჩი, კლიაიჩი (ყველა - სერბეთი), გოგა (რუმინეთი), გლიშიჩი (ჩრდილოეთ მაკედონია), სუხომლინოვი, შევჩენკო, ბოხაშვილი, აზაცკი, ტრუბოჩკინი, ლიტვინენკო (ყველა - უკრაინა), მაშუკოვი (რუსეთი), ჰამზიჩი (ბოსნია), ვაგნერ გონსალვეში, საიმონი, ჟან-მარკ ტიბუე (ყველა - საფრანგეთი), ტერა (კენია), ბენიო (ტოგო), ლუმუ, სპორსკლედე (ორივე - ნიდერლანდები), ჩიჩკანი (ბელარუსი), იაკობსენი (დანია), იმრანი (მაროკო), ოსეი, ედუძი (ორივე - განა), კამარა (გვინეა), იონსენი (ნორვეგია), ჟორჟინიო (გვინეა-ბისაუ), ოსკარ სანტისი (გვატემალა), ეტოუ, ბასინგა (ორივე - კონგო), კონტე (მალი), დრამე (სენეგალი), მატენჯვა (სამხრეთ აფრიკის რესპუბლიკა).

ამათგან საუკეთესო შედეგი ჩისკოს აქვს: ქართული საკლუბო ფეხბურთის ისტორიაში, ყველა დროის ერთ-ერთმა საუკეთესო ლეგიონერმა ორჯერ ითამაშა საქართველოს სუპერთასზე და 2014 წელს, თბილისის “დინამომ”, სწორედ ამ გამორჩეული ესპანელი შემტევის ერთადერთი გოლით მოიპოვა ეს ტიტული. ჩისკოს გარდა, სუპერთასზე გოლი გაუტანიათ სხვა ლეგიონერებსაც: ჯონი ჯერემიას (“გაგრა”), აბაიომი ოვონიკოკოს (“ზესტაფონი”), ზორან მარუშიჩს (თბილისის “დინამო”), ჟოაო არაუჟოს (“დილა”), ელიტონ ჟუნიორსა და ნიკოლა ნინკოვიჩს (ორივე-“ტორპედო”).

• არბიტრებს შორის საუკეთესო მაჩვენებელი გიორგი ვადაჭკორიას აქვს, რომელმაც ოთხჯერ იმსაჯა საქართველოს სუპერთასის მატჩი, ლაშა სილაგავამ - სამჯერ; ლევან ფანიაშვილმა, გოგა კიკაჩეიშვილმა, არსენ ნონიკაშვილმა, დავით ხარიტონაშვილმა და გიორგი ყრუაშვილმა - ორ-ორჯერ, ხოლო ელგუჯა სილაგავამ, თამაზ ლაცაბიძემ, კახა მესხმა, პაატა დოგრაშვილმა, ალექსანდრე კრიჭაშვილმა, ირაკლი ხერხაძემ და ალეკო აფციაურმა - თითო-თითოჯერ.

• საქართველოს სუპერთასის ისტორიაში მხოლოდ ოთხჯერ მოხდა, როცა გამარჯვებულის გამოსავლენად პენალტების სერია დაინიშნა: 2013 წლის 22 თებერვალს, კახა კაჭარავას ხელმძღვანელობით მოასპარეზე “ზესტაფონმა”, 4:2 მოუგო ლიტველი სპეციალისტის, ვალდას ივანაუსკასის დამოძღვრილ “დილას”; 2021 წლის 21 თებერვალს, გიორგი ნემსაძის დამოძღვრილმა თბილისის “დინამომ” 5:4 აჯობა გაგა კირკიტაძის ხელმძღვანელობით მოასპარეზე “გაგრას”; 2022 წლის 20 თებერვალს, გია გეგუჩაძის ხელმძღვანელობით მოასპარეზე ბათუმის “დინამომ” მართლაც დრამატულ პენალტების სერიაში 7:6 მოუგო “საბურთალოს”, რომელსაც იმ დროისათვის ლევან კორღალიძე წვრთნიდა; 2023 წლის 4 ივლისს, თბილისის “დინამომ” პენალტების სერიაში ბათუმის “დინამოს” აჯობა (4:3).

• საქართველოს სუპერთასის ისტორიაში მხოლოდ ერთხელ მოხდა, როცა გამარჯვებული დამატებით დროში გაირკვა: 2009 წლის 17 დეკემბერს, რუსთავის “ფოლადის” ხელოვნურ საფარზე პირველი ოფიციალური მატჩი გაიმართა; მეორე დამატებითი ტაიმის დამთავრებას ბევრი არც არაფერი უკლდა, როცა “ვიტ ჯორჯიამ” გამარჯვების მომტანი გოლი გაიტანა და თავის ისტორიაში პირველად დაეუფლა საქართველოს სუპერთასს;

• საქართველოს სუპერთასის ისტორიაში საუკეთესო ბომბარდირი გრიგოლ დოლიძე გახლავთ. ქართული საკლუბო ფეხბურთის ერთ-ერთმა ყველაზე ტიტულოვანმა მოთამაშემ, სხვადასხვა დროს, სულ ხუთჯერ ითამაშა სუპერთასზე (აქედან, ოთხჯერ გაიმარჯვა) და ამ ხუთ მატჩში 4 გოლი გაიტანა!

• გრიგოლ დოლიძეს კიდევ ერთი გამორჩეული მაჩვენებლით შეუძლია იამაყოს: ერთადერთი ფეხბურთელია, სუპერთასზე ჰეთ ტრიკი რომ აქვს შესრულებული! 2007 წლის 9 დეკემბერს, გორში გამართულ სუპერთასის მატჩში, იმ დროისათვის “ამერის” მარჯვენა გარემარბმა ერთმანეთზე უკეთესი 3 გოლი გაიტანა რუსთავის “ოლიმპის” კარში;

• საქართველოს სუპერთასზე ასევე ერთადერთ ფეხბურთელს აქვს “დუბლი” შესრულებული: სულ პირველ გათამაშებაში (1996 წლის 28 ივლისს რომ ჩატარდა), თბილისის “დინამოს” ცენტრფორვარდმა დავით ყიზილაშვილმა 2 გოლი გაიტანა ბათუმის “დინამოს” კარში;

• საქართველოს სუპერთასის აბსოლუტური რეკორდსმენი გივი დიდავა გახლავთ, რომელმაც ხუთჯერ მოიპოვა ეს ტიტული (სამჯერ - თბილისის “დინამოს” შემადგენლობაში, ორჯერ - “ამერის”)! არანაკლები მიღწევით შეუძლია იამაყოს როინ კვასხვაძესაც, რომელმაც ყველაზე მეტჯერ (შვიდჯერ!) მიიღო მონაწილეობა სუპერთასზე და ოთხჯერ გაიმარჯვა (“ტორპედო” - 2, “ზესტაფონი” - 1, თბილისის “დინამო” - 1)!

როგორც უკვე აღვნიშნეთ, ასევე ოთხჯერ აქვს მოპოვებული სუპერთასი გრიგოლ დოლიძეს (“ამერი” - 2 / “ტორპედო” - 2); სამ-სამჯერ გაუმარჯვიათ სუპერთასზე: ალექსანდრე იაშვილს (თბილისის “დინამო”), დავით ოდიკაძეს (თბილისის “დინამო” - 2 / “ჩიხურა” - 1), დავით ბოლქვაძეს (“ამერი” - 2 / “ოლიმპი” - 1), გიორგი დავითნიძეს (თბილისის “დინამო” - 1, “ამერი” - 2), შოთა ბაბუნაშვილს (“ზესტაფონი” - 2 / თბილისის “დინამო” - 1), გიორგი ქიმაძეს (“ჩიხურა” - 1 / “ტორპედო” - 2), მათე ცინცაძეს (თბილისის “დინამო” - 2 / “ტორპედო” - 1);

ასევე სამჯერ აქვთ მოგებული სუპერთასი გიორგი დათუნაიშვილს, გიორგი გაბედავასა და ჯაბა ჯიღაურს, თანაც, სამივე მათგანმა ეს 3… სხვადასხვა გუნდის მაისურით შეძლო!

საქართველოს სუპერთასის ყველა მატჩი

28.07.96 დინამო (თბ)-დინამო (ბთ) 4:0

04.08.97 დინამო (თბ)-დინამო (ბთ) 4:1

02.08.98 დინამო (თბ)-დინამო (ბთ) 1:2

29.02.00 დინამო (თბ)-ტორპედო 1:0

17.09.05 დინამო (თბ)-ლოკომოტივი 1:0

01.12.06 სიონი-ამერი 0:1

09.12.07 ოლიმპი-ამერი 1:4

03.12.08 დინამო (თბ)-ზესტაფონი 1:0

17.12.09 ვიტ ჯორჯია-დინამო (თბ) 2:1, დდ

21.12.10 ოლიმპი-ვიტ ჯორჯია 2:0

29.05.12 ზესტაფონი-გაგრა 3:1

22.02.13 ზესტაფონი-დილა 0:0, პენ 4:2

22.12.13 დინამო (თბ)-ჩიხურა 0:1

11.12.14 დინამო (თბ)-ჩიხურა 1:0

25.08.15 დილა-დინამო (თბ) 0:1

26.02.17 სამტრედია-ტორპედო 2:1

24.02.18 ტორპედო-ჩიხურა 2:1

24.02.19 საბურთალო-ტორპედო 0:1

23.02.20 დინამო (თბ)-საბურთალო 0:1

21.02.21 დინამო (თბ)-გაგრა 2:2, პენ 5:4

20.02.22 დინამო (ბთ)-საბურთალო 0:0, პენ 7:6

04.07.23 დინამო (თბ)-დინამო (ბთ) 1:1, პენ 4:3

03.07.24 დინამო (თბ)-ტორპედო 1:2

02.07.25 სპაერი-დილა 0:2