37 ქვეყანამ და ევროკავშირმა 15 მაისს ჰააგაში სპეციალური ტრიბუნალის შექმნის გადაწყვეტილება მიიღო — ის უკრაინაში რუსეთის მიერ ჩადენილ აგრესიის დანაშაულებს განიხილავს. საქართველო ამ ინიციატივას არ შეუერთდა.

საგარეო მინისტრი მაკა ბოჭორიშვილი კიშინიოვში ჟურნალისტებს განუმარტა, რატომ: „ზოგიერთი წევრი ქვეყნის, მათ შორის ევროკავშირის წევრების დამოკიდებულება ჩვენ არ გვაძლევს იმის ფუფუნებას, მივიღოთ გადაწყვეტილებები, რომლებიც დამატებით რისკებს შეუქმნის ჩვენს ქვეყანას.” მინისტრმა ასევე მოითხოვა „სიცხადე” — „რა დამოკიდებულება არსებობს საქართველოსა და მისი პოზიციების მიმართ.”

ტრიბუნალის შექმნაზე შეთანხმება ევროსაბჭოს მინისტრთა კომიტეტის სხდომაზე მოხდა. უკრაინის საგარეო მინისტრმა ანდრიი სიბიჰამ მას „ისტორიულ დღეს” უწოდა და ნიურნბერგის ტრიბუნალს შეადარა: „პუტინს ყოველთვის სურდა ისტორიაში შესვლა — ტრიბუნალი ამაში დაეხმარება და ის ისტორიაში შევა, როგორც დამნაშავე.”

ტრიბუნალს მხარი დაუჭირეს: ანდორამ, ავსტრიამ, ბელგიამ, ხორვატიამ, კვიპროსმა, ჩეხეთმა, დანიამ, ესტონეთმა, ფინეთმა, საფრანგეთმა, გერმანიამ, საბერძნეთმა, ისლანდიამ, ირლანდიამ, იტალიამ, ლატვიამ, ლიხტენშტაინმა, ლიეტუვამ, ლუქსემბურგმა, მოლდოვამ, მონაკომ, მონტენეგრომ, ნიდერლანდებმა, ნორვეგიამ, პოლონეთმა, პორტუგალიამ, რუმინეთმა, სან-მარინომ, სლოვენიამ, ესპანეთმა, შვედეთმა, შვეიცარიამ, უკრაინამ, გაერთიანებულმა სამეფომ, კოსტა-რიკამ, ავსტრალიამ და ევროკავშირმა.

მომდევნო ეტაპზე ჰააგაში მოსამართლეები დაინიშნებიან, წესები განისაზღვრება და გამოძიება დაიწყება. უკრაინა მოელის, რომ ტრიბუნალი 2027 წლიდან ამუშავდება.

15 მაისს კიშინიოვში ბოჭორიშვილი და სიბიჰა ასევე პირადად შეხვდნენ — ეს ბოლო ორ კვირაში ორი ქვეყნის მინისტრების მესამე კომუნიკაცია იყო, 2022 წლის შემდეგ ჯერ არნახული სიხშირე.