ევროსაბჭომ 19 მაისს გამოაქვეყნა „ევროპაში ციხეებისა და პატიმრების შესახებ გამოკვლევა 2025”, რომელიც 2024 წლის სტატისტიკასა და 2025 წლის 31 იანვრის მდგომარეობას ასახავს.

საქართველო 100 000 მოსახლეზე 232 პატიმრით ევროსაბჭოს ქვეყნებს შორის მე-4 ადგილს იკავებს — თურქეთის (458), აზერბაიჯანის (271) და მოლდოვის (245) შემდეგ. ანგარიში ამ მაჩვენებელს „პატიმრობაზე მიმართული სასჯელის კულტურის” გამოხატვად მიიჩნევს.

ანგარიშის სხვა მონაცემები საქართველოს შესახებ:

ციხის ერთ თანამშრომელზე პატიმრების რაოდენობით საქართველო „ძალიან მაღალი” შეფასების მქონე ქვეყნების ჯგუფშია. პატიმრების საშუალო ასაკია 39 წელი (18-ე ადგილი). 50 წელს გადასული პატიმრების წილით — „მაღალი” ჯგუფი. ქალი პატიმრების პროცენტულობით — „დაბალი” ჯგუფი.

ანგარიში ასევე მიუთითებს ზოგად ევროპულ ტენდენციაზე: ასაკოვანი და უცხო ქვეყნის მოქალაქე პატიმრების რაოდენობა იზრდება. ევროპული ინტეგრაციის გამო გადაადგილების თავისუფლება ამ „სტრუქტურულ გამოწვევას” კიდევ უფრო ამძაფრებს.

შედარებისთვის: ევროსაბჭოს ქვეყნებს შორის ყველაზე ნაკლები პატიმარი ნორვეგიაში (54), ნიდერლანდებში (55), ფინეთში (58), გერმანიაში (69), დანიაში (70) და შვეიცარიაში (77) 100 000 მოსახლეზეა.