სააპელაციო სასამართლომ თორნიკე თოშხუასა და მინდია შერვაშიძეს, რომელთაც აპრილში ჯგუფური ძალადობისთვის ერთწლიანი პატიმრობა შეეფარდათ, სასჯელი შეუმცირა, რის შედეგადაც ისინი პატიმრობიდან ვადაზე ადრე გათავისუფლდნენ.

„პუბლიკას“ ინფორმაციით, სააპელაციო სასამართლომ გამამტყუნებელი განაჩენი ძალაში დატოვა, თუმცა პატიმრობის ვადა 1 ივლისამდე შეამცირა, რის შედეგადაც ისინი დაგეგმილზე თითქმის ორი თვით ადრე ტოვებენ საპატიმროს. გავრცელებული ინფორმაციით, თოშხუა სასამართლო დარბაზიდან გათავისუფლდა, მინდია შერვაშიძე კი ციხეს რამდენიმე საათში დატოვებს.

ორივე მათგანი 2025 წლის 16 აგვისტოს დააკავეს, 1 აგვისტოს, რუსთველის გამზირზე, პარლამენტის შენობის წინ მომხდარი ინციდენტის გამო. მათ გარდაცვლილი ფეხბურთელისა და „ქართული ოცნების“ მხარდამჭერის, ბექა გოცირიძის წინააღმდეგ „ჯგუფური ძალადობის“ ფაქტზე წაუყენეს ბრალი. ხელისუფლების წარმომადგენლები აცხადებდნენ, რომ ისინი გოცირიძეს აქციის დროს დაესხნენ თავს. თუმცა, მომიტინგეებისა და გამვლელების თქმით, ჩხუბის პროვოცირება თავად გოცირიძემ მოახდინა და დანის ამოღება სცადა, რომელიც დაცემისას ხელიდან გაუვარდა. გოცირიძე თებერვალში, 37 წლის ასაკში, მოულოდნელად გარდაიცვალა.