საქართველოს ნაკრების მთავარმა მწვრთნელმა ვილი სანიოლმა ნაკრების შეკრების წინ ტრადიციული პრესკონფერენცია გამართა — ხვიჩა კვარაცხელიაზე, ახლად გამოძახებულ ირაკლი ეგოიანზე, გურამ კაშიაზე და ნაკრების მდგომარეობაზე ისაუბრა.

ხვიჩა: ფინალი ელის, მაგრამ ნაკრებთანაა

„ხვიჩასთვის ძალიან რთული იქნება რუმინეთთან მატჩი ჩემპიონთა ლიგის ფინალის შემდეგ, მაგრამ მითხრა, რომ გუნდთან ერთად ყოფნა სურს და ბაჰრეინთან მატჩისთვის მზად იქნება,” — განაცხადა სანიოლმა.

კვარაცხელიაზე კი დასძინა: „მას ხშირად აკრიტიკებდნენ, რომ მხოლოდ დიდ თამაშებში ბრწყინავდა. ხვიჩაში მომწონდა ის, რომ კრიტიკაზე არ პასუხობდა — შრომას აგრძელებდა. კრიტიკოსებს ბოლოს პასუხი თამაშით გასცა. არ ვიცი, ახლა მსოფლიოში საუკეთესოა თუ არა, მაგრამ თუ ასე გააგრძელებს, „ოქროს ბურთს” დაიმსახურებს.”

ახალი სახე — ირაკლი ეგოიანი

„ეგოიანმა ნიდერლანდებში ძალიან სტაბილური სეზონი ჩაატარა. გადავწყვიტეთ, მოგვეწვია — მაღალი ინტენსივობით თამაშობს და მატჩზე გავლენის მოხდენა შეუძლია. მჯერა, მალე გუნდის წარმატებაში წვლილს შეიტანს.”

გურამ კაშიაზე

„კაშია გამორჩეული იყო — ადამიანადაც და ფეხბურთელადაც. ფრანგებს გვაქვს გამოთქმა: ადამიანის დანაკლისს მაშინ შეაფასებ, შენს გვერდით რომ აღარ იქნება. კაშია ნაკრებს ნამდვილად დააკლდება.”

შეკრებაზე

სანიოლი ხაზს უსვამს, რომ ამ ეტაპზე ნებისმიერ ფეხბურთელს ვერ გამოიძახებ — მოწინააღმდეგის მოძიება გართულებულია მსოფლიო ჩემპიონატის წინ. რუმინეთთან ძლიერ თამაშს ელის; ბაჰრეინთან სხვა კომბინაციებს სცადოს. „შეუძლებელია ამხანაგური შეხვედრების წინ შემადგენლობა რადიკალურად შევცვალოთ — მთავარია, ყველა ფორმაში იყოს.”