საფრანგეთის ეროვნულმა ასამბლეამ — პარლამენტის ქვედა პალატამ — 12 მაისს 68 ხმით 28-ის წინააღმდეგ საქართველოზე რეზოლუცია მიიღო. დოკუმენტი ქართული ოცნების ხელისუფლების „არალიბერალურ და ავტორიტარულ” კურსს გმობს და ბიძინა ივანიშვილის სანქცირებას ითხოვს. განხილვას ყოფილი პრეზიდენტი სალომე ზურაბიშვილი ესწრებოდა.

ასამბლეა „გმობს საქართველოს მთავრობის ავტორიტარულ კურსს, ფუნდამენტური უფლებების დარღვევას, გამოხატვისა და შეკრების თავისუფლების შეზღუდვას და მშვიდობიანი დემონსტრანტების წინააღმდეგ ძალის არაპროპორციულ გამოყენებას”.

ევროკავშირის ინსტიტუტებს მოუწოდებს, საქართველოს გაწევრიანების პროცესი გააჩეროს „სანამ არ დაკმაყოფილდება პოლიტიკური კრიტერიუმები” — გამოხატვის, გაერთიანებისა და შეკრების თავისუფლება და სამართლიანი საარჩევნო პროცესი.

საფრანგეთის მთავრობას ეკისრება: „საჯაროდ დაგმოს” რუსეთის ჩარევა საქართველოს პოლიტიკაში; მხარი დაუჭიროს ევროპარლამენტის 2025 წლის 13 თებერვლის რეზოლუციაში ნახსენები პირების — ივანიშვილისა და მისი მოკავშირეების — სანქცირებას; გადახედოს ივანიშვილისთვის მინიჭებული „საპატიო ლეგიონის კავალრის” ტიტულის პირობებს და „განიხილოს ამ ჯილდოს გაუქმება”.

ასამბლეა ასევე ითხოვს ყველა პოლიტიკური პატიმრის — ოპოზიციის ლიდერებისა და ახალგაზრდა დემონსტრანტების — „დაუყოვნებლივ გათავისუფლებას” და კიდევ ერთხელ „ადასტურებს, რომ საქართველოს ევროპული მომავალი არ შეიძლება საფრთხეში ჩააგდოს ამჟამინდელი მთავრობის ქმედებებმა”.