საქართველოს ყოფილი პრეზიდენტი მიხეილ სააკაშვილი სოციალურ ქსელში სომხეთის მოსახლეობას მიმართავს 7 ივნისის საპარლამენტო არჩევნებთან დაკავშირებით. მისი ძირითადი გზავნილი ერთია: ოლიგარქ სამველ კარაპეტიანს, ვის პარტიასაც რუსეთი მხარს უჭერს, ხმა არ მისცეთ.

„სამველ კარაპეტიანი სომხური ივანიშვილია. ვფიქრობ, სომხებმა იციან, რა მოუტანა ივანიშვილმა საქართველოს — დიქტატურაზე დაფუძნებული კორუფცია, დანაშაული, ეროვნული სიმდიდრის ძარცვა, მასობრივი პოლიტიკური რეპრესიები, სოციალურ მედიაში გამოხატვის თავისუფლების შეზღუდვა, საერთაშორისო იზოლაცია და მოსკოვზე დამოკიდებულება,” — წერს სააკაშვილი.

ყოფილი პრეზიდენტი სომხეთს ახსენებს, რომ ახლა, „როცა ევროპა და ამერიკა გვერდში გიდგათ”, ის შანსი ხელიდან არ გაუშვეს, რომელიც საქართველომ, მისივე შეფასებით, გაუშვა.

„ძვირფასო სომეხო მეზობლებო, ნამდვილად ასეთი ქვეყანა გსურთ? არ გაიმეოროთ საქართველოს შეცდომა. ოლიგარქის მხარდაჭერა და ფაშინიანის წინააღმდეგ წასვლა ფაქტობრივად თვითმკვლელობის ტოლფასი იქნებოდა,” — დასძინა სააკაშვილმა.