ციხეში მყოფმა მიხეილ სააკაშვილმა სოციალურ ქსელში განაცხადა, რომ ტელეწამყვანი ნანუკა ჟორჟოლიანი „ნაციონალური მოძრაობის” რეფორმირებას ჩაუდგება სათავეში.

„შევთანხმდით, რომ პარტიის რეფორმირებისთვის შემოვიერთოთ ბრწყინვალე ნანუკა ჟორჟოლიანი და მისი შესანიშნავი გუნდი. პირადად მე ნანუკას 25 წელია ვიცნობ. მას არასდროს უღალატია იდეისთვის. ყოველთვის გამოირჩეოდა სახალხოობით, სიმართლისთვის ბრძოლით, უკიდურესი სიმამაცით და ინოვაციურობით,” — წერს სააკაშვილი.

სააკაშვილი ამბობს, რომ ლევან ხაბეიშვილთან ერთად ციხეში ყოფნის პირობებში „პარტიას სჭირდება გაცოცხლება, ფუნდამენტური განახლება და გააქტიურება”. მისი სიტყვებით, ენმ-ს მთავარი ამოცანაა „ყველა ქართველის გაერთიანება” და არა „ვიწრო ელიტარული დაჯგუფება”. მან ჟორჟოლიანს „სრული ნდობა და მანდატი” მიანიჭა.

ნანუკა ჟორჟოლიანმა სააკაშვილის მიმართვაზე საჯაროდ გამოეხმაურა. მისი სიტყვებით, სააკაშვილის წინადადება „საინტერესოა” და მოძრაობას მართლაც სჭირდება „რევოლუციური ცვლილებები” — ახალგაზრდების გაძლიერება, რეგიონებში მუშაობა და „პოლიტიკური კინკლაობებიდან რეალურ საქმეზე გადასვლა”.

„მოკლედ, ამბავი ასეთია — მიშასგან მაქვს საინტერესო წინადადება, რაზეც პრინციპში უკვე დაწერა. რა ეტაპზე ვართ? — მოლაპარაკების. წინადადება საინტერესოა, გამოწვევა გააზრებული მაქვს, რომ არც ისე მარტივი იქნება, მაგრამ ასევე მგონია, რომ შანსია დიდი ცვლილებებისთვის,” — წერს ჟორჟოლიანი.

ჟორჟოლიანი ამბობს, რომ ფიქრობს, იკრებება შეხვედრებზე და უსმენს სხვების მოსაზრებებს. „დარწმუნებული ვარ, ამ ქვეყნის მთავარი რეფორმატორების პარტიის ძველ შემადგენლობას ყველაზე კარგად ესმის, რამდენად მნიშვნელოვანია ეს ახლა,” — დასძენს ის.