უკრაინის საგანგებო სიტუაციების სამსახურის მიერ 3 ივლისს დილით გავრცელებული ცნობით, ოთხი ადამიანი, მათ შორის ერთი ბავშვი დაიღუპა და სამი ადამიანი დაშავდა სუმის ოლქის რომენის რაიონში, სადაც რუსული დრონი სახლს მოხვდა და მასშტაბური ხანძარი გამოიწვია.

სუმის ოლქის სამხედრო ადმინისტრაციის ინფორმაციით, ღამის განმავლობაში რუსეთის ჯარებმა რეგიონში დრონებით ოთხჯერ შეუტიეს ავტოგასამართ სადგურებს.

უკრაინის საგანგებო სიტუაციების სამსახურის ცნობით, გასული ღამის განმავლობაში ერთი ადამიანი დაიღუპა და 13 დაშავდა დნეპროპეტროვსკის ოლქის კრივოი-როგის, სინელნიკოვის და კამენსკის რაიონებში, სადაც დრონებით შეტევის შედეგად დაზიანებულია სახლები, სასწავლო დაწესებულებები, საწარმოები და ავტოგასამართი სადგურები.

მანამდე, 2 ივლისის საღამოს რუსეთის ჯარებმა სარაკეტო შეტევა მიიტანეს ქალაქ კრივოი-როგზე. ადგილობრივი ხელისუფლების ცნობით, დაშავდა შვიდი ადამიანი. დაზიანებულია ცხრა მრავალბინიანი სახლი, სკოლა და საწარმო.

უკრაინის საგანგებო სიტუაციების სამსახურის ცნობით, 3 ივლისს რუსული დრონებით შეტევა იყო ხარკოვის ოლქის ქალაქ ლოზოვაიაზე, სადაც დაშავდა ექვსი ადამიანი, მათ შორის სამი ბავშვი. დაზიანებული და დამწვარია რამდენიმე კერძო სახლი.

უკრაინის საჰაერო ძალების მიერ 3 ივლისს დილით გამოქვყნებული მონაცემებით, 2 ივლისის საღამოდან რუსეთის ჯარებმა უკრაინას შეუტიეს ორი მართვადი საავიაციო რაკეტით და 105 უპილოტო საფრენი აპარატით.

დილის ცხრა საათისთვის დადასტურებული იყო ერთი რაკეტის და 82 დრონის მოგერიება და ერთი რაკეტით და 21 დრონით პირდაპირი დარტყმა 16 ადგილზე.

3 ივლისს უკრაინული დრონებით და რაკეტებით შეტევისა და მსხვერპლის შესახებ განაცხადეს რუსეთის ხელისუფლების წარმომადგენლებმა.

ბელგოროდის ოლქის გუბერნატორის მოვალეობის შემსრულებლის, ალექსანდრ შუვაევის თანახმად, დილით სარაკეტო შეტევა იყო ქალაქ ბელგოროდსა და ახლომდებარე რაიონებზე, დაიღუპა ერთი და დაშავდა ორი ადამიანი. ენერგოობიექტების დაზიანების შედეგად შეფერხდა ელექტროენერგიის და წყლის მიწოდება.

დამოუკიდებელი რუსული გამოცემა ASTRA-ს ცნობით, ბელგოროდში დარტყმა იყო ელექტროსადგურ „მიჩურინსკაიაზე“.

რუსეთის ბრიანსკის ოლქის ხელისუფლების ცნობით, უკრაინული დრონებით შეტევის შედეგად ერთი ადამიანი დაიღუპა და ორი დაიჭრა.