საქართველოს პროკურატურამ რუსთავის ერთ-ერთი კომპანიის დირექტორს 1 004 798 ლარის თაღლითობის ბრალდება წარუდგინა. ბრალდებული უცხო ქვეყნის მოქალაქეს 43 ავტომობილის საზღვარგარეთიდან ჩამოყვანა-გადაცემას დაჰპირდა და ამ მიზნით წინასწარ გადახდა მოითხოვა.

შინაგან საქმეთა სამინისტროს გამოძიებით დადგინდა, რომ ბრალდებულმა დაზარალებული დაარწმუნა, ავტომობილების ჩამოსაყვანად თანხის ნაწილი წინასწარ სჭირდებოდა. შედეგად, დაზარალებულმა ეტაპობრივად — ნაღდ ფულად, საბანკო გადარიცხვებითა და კრიპტო საფულეების მეშვეობით — სულ 1 004 798 ლარი გადაუხადა.

მიუხედავად მიღებული თანხისა, ბრალდებულმა ავტომობილები ვერ ჩამოიყვანა და მის კუთვნილ თანხას თაღლითურად დაეუფლა.

ბრალდება წარდგენილია საქართველოს სისხლის სამართლის კოდექსის 180-ე მუხლის მე-3 ნაწილის „ბ” ქვეპუნქტით — დიდი ოდენობით თაღლითობისთვის. სანქცია გულისხმობს 9 წლამდე თავისუფლების აღკვეთას.