Caucasus Chronicle-ის საგამოძიებო მასალა, რომელიც რუსეთის სპეცსამსახურების მოქმედი თანამშრომლის გაჰაკერებული მობილური ტელეფონიდან გამოჟონილ საიდუმლო დოკუმენტებს ეყრდნობა, ამჟღავნებს კრემლის დეტალური გეგმების შინაარსს სომხეთში ხელისუფლების შეცვლის შესახებ.

გაჟონილი დოკუმენტების მიხედვით, რუსეთის სპეცსამსახურების ანალიტიკოსებმა ფაშინიანის ხელისუფლების დამხობის ხუთი სცენარი განიხილეს. ოთხი — სამხედრო გადატრიალება, იმპიჩმენტი, ნებაყოფლობითი გადადგომა და ქუჩის პროტესტი — შეუსრულებლად ჩათვალეს. ერთადერთ „რეალურ შანსად” 2026 წლის 7 ივნისის საპარლამენტო არჩევნები მიაჩნდათ.

კრემლის ფსონი, დოკუმენტების მიხედვით, მილიარდელ ბიზნესმენ სამველ კარაპეტიანზეა — დოკუმენტებში მას ღიად „სომეხ ივანიშვილს” უწოდებენ. გეგმის მიხედვით, კარაპეტიანის ახალი პარტია „მესამე ძალის” პოზიციაში უნდა წარდგეს: ეკონომიკური კეთილდღეობისა და ინვესტიციების დაპირებით, მაგრამ მთავარი მიზნით — „რუსეთთან სტრატეგიული ურთიერთობების აღდგენა.”

დოკუმენტების ციტატა: „ოპოზიციური ველი უნდა გაერთიანდეს ერთ დიდ ალიანსში […] როგორც ეს მოხდა საქართველოში 2012 წლის საპარლამენტო არჩევნებზე, სადაც სააკაშვილის პარტიამ სასტიკი მარცხი განიცადა მილიარდელ ივანიშვილის ხელმძღვანელობით შექმნილ ოპოზიციასთან.”