19 მაისს რუსეთმა სამდღიანი სამხედრო წვრთნები „აგრესიის საფრთხის პირობებში ბირთვული ძალების გამოყენების მოსამზადებლად” დაიწყო. წვრთნები 21 მაისს უნდა დასრულდეს.

რუსეთის თავდაცვის სამინისტროს ცნობით, სწავლებაში მონაწილეობენ სტრატეგიული სარაკეტო ჯარები, ჩრდილოეთისა და წყნარი ოკეანეების ფლოტი, შორეული ავიაციის სარდლობა და ლენინგრადისა და ცენტრალური სამხედრო ოლქების ნაწილები. სულ — 64 ათასზე მეტი სამხედრო მოსამსახურე, 200-ზე მეტი სარაკეტო დანადგარი, 140-ზე მეტი საფრენი აპარატი, 73 გემი და 13 წყალქვეშა ნავი, მათ შორის 8 სტრატეგიული ბირთვული წყალქვეშა ნავი.

სწავლებისას პოლიგონებიდან გაიშვება ბალისტიკური და ფრთოსანი რაკეტები. ასევე „დამუშავდება ბელარუსის ტერიტორიაზე განთავსებული ბირთვული იარაღის ერთობლივი მომზადებისა და გამოყენების საკითხები.”

წვრთნებამდე ერთი დღით ადრე — 18 მაისს — ბელარუსის თავდაცვის სამინისტრომაც დაიწყო ცალკე სწავლება „ბირთვული იარაღის საბრძოლო გამოყენებისა და ბირთვული უზრუნველყოფის სამხედრო ნაწილების” მზადყოფნის შემოწმებით. რუსეთმა ბელარუსში ტაქტიკური ბირთვული იარაღი 2023 წლიდან, უკრაინაში სრულმასშტაბიანი შეჭრის შემდეგ განათავსა.

ეს პირველი ასეთი წვრთნა არ არის — წინა ჩატარდა 2025 წლის ოქტომბერში. უკრაინაში ომის დაწყებიდან კრემლის ოფიციალური პირები, განსაკუთრებით ყოფილი პრეზიდენტი მედვედევი, ბირთვულ დარტყმებს პერიოდულად ახსენებენ.