რუსეთის სოფლის მეურნეობის ხარისხის კონტროლის სამსახურმა (Россельхознадзор) სამი სომხური კომპანიის ღვინოები და კონიაკები რუსეთის ბაზარზე გაყიდვიდან ამოიღო. კომპანიებია: „ვედი-ალკო”, „აბოვიანის კონიაკის ქარხანა” და „შაჰნაზარიანის ღვინისა და კონიაკის სახლი”. მათ შორის — „5-ვარსკვლავიანი სომხური კონიაკი” და „შაჰნაზარიანის XO”.

ოფიციალური დასაბუთება — ლაბორატორიული ანალიზი ფიზიკური და ქიმიური სტანდარტების შეუსაბამობას ადასტურებს. იმავე ლოგიკით, „Роспотребнадзор”-მა „ჯერმუკის” მინერალური წყლის შემოტანაც შეზღუდა — ეტიკეტი ჰიდროკარბონატ-იონების შემცველობას ჭარბი ოდენობით ასახავდა.

ასევე შეიზღუდა სომხეთიდან ყვავილების შემოტანა — „ფიტოსანიტარიული უსაფრთხოების” მიზეზით.

ანალიტიკოსები ამ ნაბიჯებს პოლიტიკური ზეწოლის კლასიკურ ინსტრუმენტად მიიჩნევენ. რუსეთი ამ პრაქტიკას ათწლეულებია მეზობელ ქვეყნებთან — მათ შორის საქართველოსა და უკრაინასთან — ურთიერთობის გაუარესებისას იყენებს.

სომხეთ-რუსეთის ურთიერთობა 2024 წლიდან მკვეთრად გაუარესდა: სომხეთმა ОДКБ-ში მონაწილეობა შეაჩერა, ევროკავშირთან დაახლოებისკენ სვლა დაიწყო, ხოლო პრემიერ ფაშინიანმა ორ ქვეყანას შორის ურთიერთობა ღიად გააკრიტიკა.