ომის დაწყების შემდეგ პირველად სარაკეტო საფრთხის რეჟიმი ერთდროულად გამოცხადდა რუსეთის ურალის ფედერალური ოლქის ყველა რეგიონში. ამ ინფორმაციას ავრცელებს რადიო თავისუფლების რუსული სამსახური, ოლქში პრეზიდენტის წარმომადგენელ არტიომ ჟოგაზე დაყრდნობით.

იამალ-ნენთა ავტონომიურ ოლქში, სადაც განგაში ომის დაწყების შემდეგ პირველად გაისმა, გუბერნატორმა დმიტრი არტიუხოვმა მოსახლეობას მოუწოდა, შენობებში დარჩენილიყვნენ და ფანჯრებს არ მიახლოვებოდნენ. ეს ოლქი უკრაინის საზღვრიდან ორ ათას კილომეტრზე მეტ მანძილზე მდებარეობს.

Bloomberg-ის შეფასებით, უკრაინური დრონების მოქმედების რადიუსის გაზრდის შედეგად პოტენციური დარტყმის ზონაში მოექცა რუსეთის სტრატეგიულად მნიშვნელოვანი ტერიტორიები და მათი მოსახლეობის დიდი ნაწილი.

გახშირებული შეტევები

აპრილის შემდეგ უკრაინის უპილოტო საფრენი აპარატები სულ მცირე ხუთ შეტევაში ჩელიაბინსკს დაარტყეს, რამდენჯერმე ჩააღწიეს ეკატერინბურგსა და პერმამდე, შებოქსარიც დაარტყეს. 4 მაისის ღამეს დრონი მოსკოვში კრემლიდან ექვს კილომეტრში მდებარე საცხოვრებელ სახლს მოხვდა.

გახშირებული შეტევების ფონზე რუსეთის ხელისუფლება უსაფრთხოების ზომებს აძლიერებს. Financial Times-ის ინფორმაციით, კრემლმა ასევე გაამკაცრა პრეზიდენტ პუტინის დაცვის ზომები.