სამდღიანი დროებითი ზავის ვადის ამოწურვის შემდეგ, 12 მაისის გამთენიისას, რუსეთის სამხედრო ძალებმა უკრაინაზე მასირებული შეტევა სადამრტყმელი უპილოტო საფრენი აპარატებით მიიტანეს.

კიევის მერის, ვიტალი კლიჩკოს ცნობით, დედაქალაქის ობოლონის რაიონში დრონების ნამსხვრევები 16-სართულიანი სახლის სახურავზე ჩამოვარდა და ხანძარი გამოიწვია — დაზიანებულია სახლის ტექნიკური სართული.

დნეპროპეტროვსკის ოლქის სამხედრო ადმინისტრაციის ხელმძღვანელ ოლექსანდრ განჟის ცნობით, ქალაქ დნიპროში ერთი ადამიანი დაიჭრა და სატრანსპორტო ინფრასტრუქტურა დაზიანდა.

შეახსენებთ, აშშ-ის პრეზიდენტმა დონალდ ტრამპმა 8 მაისს გამოაცხადა, რომ უკრაინა და რუსეთი სამდღიან ცეცხლის შეწყვეტას შეთანხმდნენ — 9, 10 და 11 მაისს. ამ სამი დღის განმავლობაში ორივე მხარე ერთმანეთს ბრალდებდა ზავის დარღვევაში, თუმცა შორ მანძილზე დარტყმები არ ყოფილა.