აშშ-ის სახელმწიფო მდივანმა მარკო რუბიომ კონგრესმენ ჯო უილსონის კითხვაზე პასუხისას განაცხადა, რომ ქართულ მხარეს „მკაფიოდ განუმარტეს, რა არის საჭირო ამერიკის შეერთებულ შტატებთან ურთიერთობების გასაუმჯობესებლად”, და გამოთქვა იმედი, რომ საქართველოში მოვლენების ტრაექტორიის შეცვლა შესაძლებელი გახდება.

კონგრესმენმა უილსონმა განაცხადა, რომ „პროირანული რეჟიმი და ჩინეთის კომუნისტური პარტია მხარს უჭერენ ქართული ოცნების მთავრობას, რომელიც არალეგიტიმურია”. მისი სიტყვებით, ამ მთავრობამ გაყალბებული არჩევნებით მოიპოვა ხელისუფლება, ემუქრება ამერიკის ინტერესებს და ხელს უწყობს ირანის ისლამური რევოლუციის გუშაგთა კორპუსს სანქციების გვერდის ავლით. კონგრესმენმა რუბიოს ჰკითხა, რა ზომები უნდა მიიღოს ვაშინგტონმა „ქართული ოცნების” ხელშეწყობილ რადიკალიზაციაზე სწრაფი რეაგირებისთვის.

სახელმწიფო მდივანმა სრულად გაიზიარა უილსონის შეშფოთება, თუმცა დასძინა, რომ ქართულ მხარეს შემდგომ „გარკვეული ნაბიჯები გადაუდგამს, რაც მიანიშნებს, სურთ ურთიერთობების გაუმჯობესება”.

„საქართველოს საკითხზე თქვენ მართალი ხართ — ყველაფერი, რაც ახლა ჩამოთვალეთ, ჩვენი შეშფოთების საგანია. მათგან მივიღეთ გარკვეული პოზიტიური სიგნალები. შესაბამისად, ვიმედოვნებთ, შევძლებთ შევცვალოთ ის ტრაექტორია, რომელზეც საქართველო დღეს იმყოფება. ჩვენ, რა თქმა უნდა, ვაცნობიერებთ, რომ ჩამოთვლილი თითოეული საკითხი კვლავ პრობლემად რჩება. მათ თავად გვკითხეს, რა არის საჭირო. ჩვენ პასუხი მივეცით და ვიმედოვნებთ — შეიცვლება არა მხოლოდ ჩვენი ურთიერთობები, არამედ მათი ქცევა,” — განაცხადა რუბიომ.