ქართველი მხატვარი თედო რეხვიაშვილი ვენეციის ბიენალეზე ნაურუს ეროვნულ პავილიონში, „ტროის ცხენის” მეტაფორით, სწორედ იმ ქვეყნის სახელით გამოვიდა, რომელმაც საქართველოს ოკუპირებული ტერიტორიების — აფხაზეთისა და სამხრეთ ოსეთის — ე.წ. დამოუკიდებლობა აღიარა.

მისი ნამუშევარია ნიჟარა, აფხაზეთის სანაპიროდან აღებული. ნიჟარაზე ექვსი ქალაქის — გულრიფშის, ტყვარჩელის, გაგრის, სოხუმის, ბიჭვინთისა და ოჩამჩირის — ხედები გამოსახულია. „ყურზე თუ მიიდებ, ზღვის ხმებს გაიგებ — ანუ ნიჟარას ახსოვს ის ისტორია, რაც იქ მოხდა,” — განმარტავს რეხვიაშვილი.

ნამუშევარს ასევე ახლავს აუდიოინსტალაცია: ზღვისა და თოლიების ხმებს მოულოდნელად ცვლის ომისა და სასოწარკვეთილი ადამიანების ხმები.

„ჩემი ნამუშევრის კონცეფცია ჩემთვის პირადია — არა მხოლოდ როგორც ქართველისთვის, არამედ იმ ადამიანისთვის, რომლის ოჯახსაც მჭიდრო კავშირი ჰქონდა აფხაზეთთან. ჩვენც გვაქვს დევნილის სტატუსი,” — ამბობს მხატვარი.

2026 წლის ბიენალეზე ნაურუს პავილიონი პირველად გამოვიდა. 11 მხატვრიდან — რომელთა შორის მხოლოდ ერთი იყო ნაუნელი — სამი კურატორი ირჩევდა, ვინ გახსნიდა გამოფენას; ეს პატივი თედოს ნამუშევარმა მოიპოვა. პავილიონის კონცეფციის ცენტრალური თემებია იმპერიალიზმი, ეკოლოგიური კატასტროფები და დანაკარგი.

„ვცადე ჩემი შეთავაზება: მონაწილეობას მივიღებ, ოღონდ მარტო აფხაზეთის თემაზე ვიმუშავებ და ჩემი კონტექსტით,” — ჰყვება რეხვიაშვილი, როგორ წარუდგინა კურატორებს პროვოკაციული განაცხადი. „ისინი დაინტერესდნენ.”