ხარაგაულის მუნიციპალიტეტის რეგიონულმა მედია საშუალებამ,  „ჩემი ხარაგაული“, განაცხადა, რომ მისი ჟურნალისტი ადგილობრივი საკრებულოს სხდომის ფოტოდან ამოჭრეს.

მედიის საშუალების ინფორმაციით, ხარაგაულის საკრებულომ 6 ივლისის სხდომის ფოტოები ატვირთა და ერთ-ერთიდან  ჟურნალისტი ნინო კაპანაძე ამოჭრა მიუხედავად იმისა, რომ ის მთელი შეხვედრის განმავლობაში ერთსა და იმავე ადგილას იჯდა. მედია საშუალებამ განაცხადა, რომ მას შემდეგ, რაც ხარაგაულის მერის მოადგილეს, ვარლამ ჭიპაშვილს შეუსაბამობის შესახებ აცნობეს, ფოტო ხელახლა აიტვირთა თავდაპირველი ვერსიით, რომელზეც „ჩემი ხარაგაულის“ ჟურნალისტიც იყო გამოსახული.

გამოცემამ აღნიშნა, რომ მისი ჟურნალისტი საკრებულოს წევრებისთვის განკუთვნილ სკამზე იჯდა, რადგან საკრებულოს წევრების რაოდენობის გაზრდის შემდეგ ჟურნალისტებისთვის რეგლამენტით გათვალისწინებული ადგილები აღარ დარჩა. „ჩემი ხარაგაულის“ ინფორმაციით, ჟურნალისტებმა არაერთხელ გამოთქვეს შეშფოთება საკრებულოს სხდომებზე ჟურნალისტებისთვის გამოყოფილი სივრცის არარსებობასთან დაკავშირებით. გამოცემამ განაცხადა, რომ 6 ივლისის შეხვედრაზე მის ჟურნალისტს მიუთითეს, რომ მერიის წარმომადგენლებისთვის გამოყოფილი ერთ-ერთი ადგილი დაეკავებინა; ხოლო „ჩემი ხარაგაულის“ რედაქტორს თავმჯდომარის სამუშაო მაგიდის გვერდით დაჯდომა შესთავაზეს.

ინციდენტს საქართველოს ჟურნალისტური ეთიკის ქარტიის მხრიდან კრიტიკა მოყვა, რომელმაც მოუწოდა ხარაგაულის საკრებულოს „უზრუნველყოს საკრებულოს სხდომების საჯაროობა, არ გააყალბოს რეალობის ამსახველი ფოტოები და მედიის წარმომადგენლებისათვის შექმნას ადეკვატური სამუშაო პირობები“.