ტრამპის ადმინისტრაციამ კუბის ყოფილ პრეზიდენტს, 94 წლის რაულ კასტროს ბრალი წარუდგინა — ამის შესახებ Reuters-ს ადმინისტრაციის წარმომადგენელი აცნობებს. ბრალდება ოფიციალურად ჯერ არ გამოცხადებულა, თუმცა მრავალი დასავლური მედიის ცნობით, საქმე, სავარაუდოდ, 1996 წლის ინციდენტს ეფუძნება — მაშინ კუბური ავიაგამანადგურებლებმა კუბელი ემიგრანტების ჯგუფის მიერ მართული ორი თვითმფრინავი ჩამოაგდეს, რომელთა ეკიპაჟი აშშ-ს მოქალაქეებისგან შედგებოდა.

20 მაისს გავრცელებულ ვიდეომიმართვაში სახელმწიფო მდივანმა მარკო რუბიომ კუბელ ხალხს ახალი ურთიერთობის პერსპექტივა შესთავაზა: 100 მილიონი დოლარის დახმარება — კათოლიკური ეკლესიის ან სხვა სანდო ორგანიზაციების მეშვეობით, კუბის სამხედრო მთავრობის გვერდის ავლით. რუბიოს მშობლები კუბელი ემიგრანტები არიან.

Reuters-ი განმარტავს, რომ ბოლო რამდენიმე თვეა ვაშინგტონმა კუბას ფაქტობრივი ბლოკადა დაუწესა — ქვეყნებს, რომლებიც კუბას საწვავს მიაწვდიან, სანქციებით ემუქრება. ამის შედეგად კუბა ბოლო ათწლეულებში ყველაზე მძიმე ელექტროენერგიისა და საწვავის კრიზისს განიცდის.

რაულ კასტრო 2008 წელს გახდა კუბის პრეზიდენტი — ძმა ფიდელის ავადმყოფობის შემდეგ. 2018 წელს პოსტი დათმო, თუმცა ქვეყნის პოლიტიკაში გავლენიანი ფიგურად დარჩა. ფიდელ კასტრო 2016 წელს გარდაიცვალა. Reuters-ი ასევე შეახსენებს, რომ მსგავსი სისხლისსამართლებრივი ბრალდებები ადმინისტრაციამ ვენესუელას ყოფილი ლიდერის ნიკოლას მადუროს შესაჩერებლად გამოიყენა — 3 იანვარს კარაკასში ჩატარებულ სამხედრო რეიდში მადურო დააკავეს და ნიუ-იორკში ექსტრადიცია მოახდინეს.