რადიო თავისუფლებამ განაცხადა, რომ ოკუპირებულ აფხაზეთში თბილისის მიერ კონტროლირებადი ტერიტორიიდან საწვავი ქართულმა კომპანია „სოლიდუსმა“ შეიტანა.

„სოლიდუსი“ არის კომპანია, რომელიც „სპეციალური საწარმოს სტატუსს“ ფლობს. ეს სტატუსი კომპანიებს საშუალებას აძლევს, საქმიანობა საქართველოს ოკუპირებულ ტერიტორიებზე განახორციელონ.  „ქართული ოცნების“ პრემიერ-მინისტრ ირაკლი კობახიძის მიერ 11 აგვისტოს ხელმოწერილი განკარგულების თანახმად, „სოლიდუსს“ ოკუპირებულ ტერიტორიებზე საქმიანობის განხორციელების უფლებამოსილება კიდევ სამი თვით გაუგრძელდა, რაც უკუქცევით 18 ივლისიდან წარმოშობილ სამართლებრივ ურთიერთობებზე ვრცელდება.

კომპანიის მფლობელმა, გიორგი არველაძემ, გამოცემასთან საუბარში განაცხადა, რომ ტვირთი დაახლოებით 300 ტონა საწვავს შეადგენდა, რომელიც მისმა კომპანიამ აფხაზ პარტნიორებს ენგურის ხიდის მეშვეობით მიაწოდა.

„აქამდე ხდებოდა სასოფლო-სამეურნეო და საკვები პროდუქციის მიწოდება, საწვავის მიწოდება პირველად მოხდა“, – განაცხადა მან. „ეს არის ხიდი ქართულ და აფხაზურ ბიზნესს შორის“.

არველაძის თქმით, საწვავი „ძირითადად გალის მოსახლეობისთვის, იქაური ბენზინგასამართი სადგურებისთვის“ არის განკუთვნილი. „ეს რომ არ შეგვეტანა, 20-ლიტრიანი კანისტრებით დაიწყებდა 40 ათასი ქართველი გადმოსვლას ზუგდიდში“. მან ასევე აღნიშნა, რომ აფხაზეთში შეტანილი ბენზინი ქვეყანაში ევროპიდან შემოვიდა.

ტელეკომპანია „პირველთან“ საუბრისას, არველაძემ განაცხადა, რომ მისმა კომპანიამ მხოლოდ ბენზინი შეიტანა, არა დიზელი, და რომ ტრანზაქცია „აფხაზ ბიზნესმენებთან“ ერთად განხორციელდა და ეს იყო პირველი ასეთი ტრანზაქცია 33 წლის მანძილზე. მან აღნიშნა, რომ ტვირთის შეტანა მისი ინიციატივით მოხდა, საქართველოს მთავრობის მხრიდან რაიმე სახის ჩარევის გარეშე. მან თავი შეიკავა იმ კომპანიის დასახელებისგან, საიდანაც ბენზინი შეიძინა.

საწვავის მიწოდებამ კითხვები და კრიტიკა გამოიწვია ოპოზიციონერი პოლიტიკოსების მხრიდან, რომლებმაც მიმწოდებელი კომპანიის იდენტიფიცირება მოითხოვეს. მათ გამოთქვეს შეშფოთება, რომ საწვავი შესაძლოა რუსეთის ხელში აღმოჩნდეს და პოტენციურად მის სამხედრო ძალისხმევას დაეხმაროს.

„ქართული ოცნების“ წევრებმა ეს კრიტიკა უარყვეს და ოპონენტები ჰუმანიტარული ძალისხმევისთვის ზიანის მიყენების მცდელობაში დაადანაშაულეს. მათ გამორიცხეს, რომ ტვირთით შესაძლებელი იყო რუს სამხედროებს ესარგებლათ.