რუსეთის პრეზიდენტი ვლადიმირ პუტინი 19 მაისს ჩინეთის სახალხო რესპუბლიკაში ჩავიდა ორდღიანი ოფიციალური ვიზიტით. ეს მისი 25-ე ვიზიტია ჩინეთში.

ვიზიტი ეძღვნება ორ ქვეყანას შორის კეთილმეზობლობის, მეგობრობისა და თანამშრომლობის შეთანხმების ხელმოწერის 25 წლისთავს. 2026 წელს ასევე აღინიშნება ჩინეთ-რუსეთის სტრატეგიული პარტნიორობის 30 წლისთავი.

აეროპორტში პუტინს ჩინეთის საგარეო საქმეთა მინისტრი ვან ი დახვდა. ტრადიციისამებრ, სახელმწიფო მეთაური საკუთარ Aurus-ში გადაადგილდება, რომელიც სპეციალურად რუსეთიდან ჩაიტანეს — თუმცა სანომრე ნიშნები ჩინურით შეუცვალეს.

ვიზიტის მთავარი ღონისძიება პუტინისა და სი ძინპინის ინდივიდუალური შეხვედრაა, სადაც „ჩაის სმისას” ყველაზე აქტუალური საერთაშორისო პრობლემები განიხილება. ამასთან, ლი ციანთან, ჩინეთის სახელმწიფო საბჭოს პრემიერთან, სავაჭრო-ეკონომიკური თანამშრომლობის პერსპექტივა განიხილება.

ორი ლიდერი ხელს მოაწერს ერთობლივ განცხადებას და მთავრობათაშორის დოკუმენტებს. გარდა ამისა, ისინი მონაწილეობას მიიღებენ რუსეთისა და ჩინეთის განათლების წლების (2026–2027) გახსნის ცერემონიაში.

ვიზიტამდე პუტინმა ვიდეომიმართვა გაავრცელა: „რუსეთ-ჩინეთის ურთიერთობებმა უპრეცედენტო დონეს მიაღწია. ორმხრივი სავაჭრო ბრუნვა 200 მილიარდ დოლარს დიდი ხანია გადააჭარბა, ანგარიშსწორება კი თითქმის მთლიანად რუბლებსა და იუანებში ხდება.”

ჩინეთის სახელმწიფო სააგენტო „სინხუას” ინფორმაციით, 2025 წელს ორმხრივმა ვაჭრობამ 228 მილიარდ დოლარს მიაღწია. ჩინეთი ზედიზედ 16 წელია რჩება რუსეთის უმსხვილეს სავაჭრო პარტნიორად. 2013 წლის შემდეგ ორი ლიდერი 40-ზე მეტჯერ შეხვდა ერთმანეთს სხვადასხვა ფორმატში.