პანკჯგუფი Pussy Riot „ტერორისტებისა და ექსტრემისტების” ოფიციალურ სიაში შეიყვანა რუსეთმა — ამის შესახებ „როსფინმონიტორინგის” განახლებული ჩამონათვალი მოწმობს.

2025 წლის ნოემბერში გენერალურმა პროკურატურამ ჯგუფის ექსტრემისტულად გამოცხადების მოთხოვნით სარჩელი შეიტანა. სარჩელი ეფუძნება ჯგუფის „სახელმწიფო უსაფრთხოებისთვის საშიშ” გამოსვლებს — მათ შორის „ცეკვა ქრისტე მაცხოვრის ტაძარში” და 2018 წლის ფეხბურთის მსოფლიო ჩემპიონატის ფინალურ მატჩზე მოსკოვის მოედანზე გამოვარდნა. სარჩელი 2025 წლის დეკემბერში დაკმაყოფილდა.

Pussy Riot ფემინისტური პანკჯგუფია, 2011–2012 წლების საპროტესტო ტალღის ერთ-ერთი სიმბოლო. ყველაზე ცნობილი მათი გამოსვლა იყო „პანკ-ლოცვა” — „ღვთისმშობელო, განდევნე პუტინი” — მოსკოვის ქრისტე მაცხოვრის ტაძარში. ამ აქციის გამო ჯგუფის ორ წევრს, ნადეჟდა ტოლოკონიკოვასა და მარია ალიოხინას, ხულიგნობის ბრალდებით ორი წელი პატიმრობა მიუსაჯეს.

ჯგუფის წევრების უმეტესობა ახლა საზღვარგარეთ ცხოვრობს. Pussy Riot ფუნქციონირებს აქტივისტების ქსელის სახით — ფიქსირებული შემადგენლობა მას არ ჰყავს.

მიმდინარე წლის სექტემბერში მოსკოვის სასამართლომ ჯგუფის ხუთ წევრს დაუსწრებლად 8–13 წლიანი სასჯელი მიუსაჯა. სარჩელი ეფუძნება „ყალბი ინფორმაციის” გავრცელებას რუსული არმიის შესახებ. მარია ალიოხინამ 13 წელი მიიღო, ტასო პლეტნერმა — 11, ხოლო სამ სხვა წევრს — 8 წელი მიესაჯა. ყველა ბრალდებული უდანაშაულოდ ცნობს თავს.

ბრალდების ნაწილი ეფუძნება 2022 წლის ომის საწინააღმდეგო კლიპს „დედა, ტელევიზორს ნუ უყურებ” და 2024 წელს მიუნხენის Pinakothek der Moderne მუზეუმში გამართულ წარმოდგენას, სადაც ჯგუფის წევრებმა პუტინი სამხედრო დამნაშავედ მოიხსენიეს.

მაისის დასაწყისში Pussy Riot-მა Femen-ის წევრებთან ერთად ვენეციის ბიენალეზე გამართა პროტესტი — ამჯერად რუსეთის გამოფენაში მონაწილეობის წინააღმდეგ.