„პარი სენ-ჟერმენის” ბუდაპეშტში ჩემპიონთა ლიგის მოგების ღამეს პარიზი — და მთელი საფრანგეთი — ძალადობის ეპიცენტრად იქცა. შინაგან საქმეთა მინისტრ ლორან ნუნიეს განცხადებით, ქვეყნის მასშტაბით 780 ადამიანი დააკავეს, 57 პოლიციელი დაიჭრა, ხოლო საერთო ჯამში 219 მოქალაქე — მათ შორის 8 მძიმედ — გახდა ძალადობის მსხვერპლი.

ერთი ახალგაზრდა, 20-წლის მამაკაცი, გარდაიცვალა — ის მოტოციკლით პარიზის წრიული გზის გასასვლელ პანდუსზე ბეტონის ბლოკებს შეეჯახა. პარიზის პროკურატურამ კიდევ ერთი ახალგაზრდა კაცის მძიმე ჭრილობების შესახებ გამოაცხადა — ის, სავარაუდოდ, ძარცვის მიზნით, დანით დაიჭრა.

შანზ-ელიზეზე დაახლოებით 22 000 ადამიანი შეიკრიბა. პოლიციამ ბრბოს დასაშლელად ცრემლსადენი გაზი გამოიყენა. გულშემატკივრები ფეიერვერკებს ისვრიდნენ, მაღაზიებს ძარცვავდნენ, ერთ-ერთ ჯგუფს პოლიციის განყოფილების შტურმიც სცადა. ინციდენტები 71 მუნიციპალიტეტში დაფიქსირდა, მძარცველები და ვანდალები 15 ქალაქში გამოჩნდნენ.

დაკავებულთა შორის 82 არასრულწლოვანია. წელს დაპატიმრებების რაოდენობა 32 პროცენტით გასცდა გასულ წელს პსჟ-ს იმავე ტიტულის შემდეგ მომხდარ ანალოგიურ ინციდენტებს.

„შანზ-ელიზეს გამზირი და მისი შემოგარენი ზეიმის ადგილი კი არ იყო, ის ქალაქის პარტიზანული ომის არენად იქცა,” — ნათქვამია პარიზის მერიის განცხადებაში.

კვირას მოსალოდნელია მოთამაშეთა ვიქტორია-პარადი — ეიფელის კოშკის წინ 100 000-მდე გულშემატკივარს ელოდებიან. პრეზიდენტი მაკრონი ფეხბურთელებს ელისეს სასახლეში მიიღებს. მინისტრი ნუნიესი „სამართალდამცავი ორგანოების მკაცრი რეაგირების” პირობას დებს.