საქმე არის აღძრული ზუსტად ამ მიდგომასთან დაკავშირებით, რაც არის მოღალატეობრივი მიდგომა, რაც არის, ფართო გაგებით, დანაშაულებრივი მიდგომა. ვნახოთ, რა კვალიფიკაციას მისცემენ ამას საგამოძიებო უწყებები, მაგრამ საკუთარი ქვეყნის ღალატი ზუსტად ეს არის: „შიგნით აქცია, გარეთ სანქცია“-, ასე აფასებს პრემიერ-მინისტრი, ირაკლი კობახიძე „ოპოზიციური ალიანსის“ ერთ-ერთი ლიდერის, ნიკა გვარამიას განცხადებას, რომელიც ოპოზიციის სტრატეგიას ეხება.

როგორც ირაკლი კობახიძე მიიჩნევს, „ქვეყანაში აქცია, გარეთ სანქცია“ - ზუსტად ეს მიდგომა ამყარებს იმ სარჩელს, რომელიც „ქართულმა ოცნებამ“ ოპოზიციური პარტიების წინააღმდეგ საკონსტიტუციო სასამართლოში შეიტანა.

“ეს არის საკუთარი ქვეყნის ღალატი - „შიგნით აქცია, გარეთ სანქცია“, ანუ ქვეყნის შიგნით უნდა შეკრიბო 150 კაცი იმისთვის, რომ გარეთ შექმნა ფონი მტრული საქმიანობისთვის. ეს არის ძალიან მარტივი ლოგიკა, რომელსაც ეფუძნება მათი დანაშაულებრივი, ანტისახელმწიფოებრივი, მოღალატეობრივი საქმიანობა. რა თქმა უნდა, ამას სათანადო პასუხი უნდა გაეცეს. ამას 2024-2025 წლებში სათანადო პასუხი გასცა არჩევნებზე საზოგადოებამ, თუმცა ესეც არ არის საკმარისი. ჩვენ გვაქვს მომზადებული სარჩელი საკონსტიტუციო სასამართლოში. ქვეყანაში აქცია, გარეთ სანქცია - ზუსტად ეს მიდგომა ამყარებს იმ სარჩელს, რომელიც არის შეტანილი საკონსტიტუციო სასამართლოში. ეს არის ღია მტრული დამოკიდებულება საკუთარი ხალხის, სახელმწიფოს, ქვეყნის მიმართ და ამას სჭირდება სათანადო პასუხი. საზოგადოება, ყოველ ჯერზე, პასუხს სცემს არჩევნებზე ამ მიდგომას, თუმცა ამას სჭირდება სათანადო სამართლებრივი პასუხიც“, - აცხადებს კობახიძე.

ცნობისთვის, „ოპოზიციური ალიანსის“ ერთ-ერთმა ლიდერმა ნიკა გვარამიამ სოციალურ ქსელში პოსტი დაწერა, რომელიც მისივე განმარტებით, ოპოზიციის სტრატეგიას ეხება.

„ოპოზიციის სტრატეგია გაცხადებულია: შიგნით აქცია, გარეთ სანქცია; ალტერნატივა - ყველა უნდა დაფიქრდეს იმაზე, რას აკეთებს, რა უნდა და რას აპირებს. ყველა უნდა დაფიქრდეს, რისთვის იბრძვის - პოლიტიკური თვითდამკვიდრებისთვის, ოპონენტების დასუსტებისთვის 2028 წლის არჩევნების წინ, ციხიდან გამოსასვლელად (ან იქ არ შესასვლელად), თუ იბრძვის ქვეყნისთვის და იბრძვის ბიძინას წინააღმდეგ. სიტყვების რახარუხი არაფერს არ ცვლის“- წერს გვარამია

როგორც გვარამია აღნიშნავს, ერთიანობა და ალტერნატივა არის მთავარი მოთხოვნა საზოგადოების და პროტესტის უმნიშვნელოვანესი წინაპირობა, რაც „26 მაისის აქციამაც აჩვენა“.