კრემლის პრესსამსახურის ხელმძღვანელმა დმიტრი პესკოვმა 25 მაისის ბრიფინგზე განაცხადა, რომ სომხეთი ევრაზიულ ეკონომიკურ კავშირს თუ დატოვებს, გაზის „შეღავათიანი” ფასი გაუქმდება.

„ჩვენმა მეგობრებმა ერევანში ეს ძალიან კარგად იციან”, — თქვა პესკოვმა.

სომხეთი რუსეთისგან ათასი კუბური მეტრი გაზი 177,55 აშშ დოლარად შეისყიდის. ევროპა იმავე მოცულობისთვის 633 დოლარს იხდის.

სომხეთის პასუხი

სომხეთის პარლამენტის სპიკერმა ალენ სიმონიანმა აპრილში განაცხადა: თუ რუსეთი გაზს გააძვირებს, სომხეთი დატოვებს კოლექტიური უსაფრთხოების ხელშეკრულების ორგანიზაციას და ევრაზიულ ეკონომიკურ კავშირს.

ეს განცხადება გაიჟღერა 4 აპრილს, მას შემდეგ რაც პუტინმა ფაშინიანთან შეხვედრაზე გაზის „შეღავათიანი ტარიფი” ახსენა.

კრემლი ოპოზიციის შესახებ

პესკოვმა ასევე ისაუბრა სომხეთის ოპოზიციაზე: „ჩვენ ვიცით, რომ სომხეთში არსებობენ პოლიტიკური ძალები, რომლებიც სრულად უჭერენ მხარს რუსეთთან ღრმა ინტეგრაციის გზას. ჩვენ ამ მიდგომას ვაფასებთ.”

„რუსეთი და სომხეთი, როგორც ევრაზიული ეკონომიკური კავშირის წევრები, მეგობრებად რჩებიან”, — დასძინა პესკოვმა.