საქართველოს პარლამენტი ჟურნალისტებისთვის სააკრედიტაციო წესებს ამკაცრებს: განმეორებითი დარღვევის შემთხვევაში მედიაზე აკრედიტაცია ერთ წლამდე ვადით სრულად შეიძლება შეჩერდეს.

„დარღვევის სიმძიმის და სიხშირის გათვალისწინებით, შესაძლებელი იქნება, რომ გაუუქმდეს მთლიანად მედიას აკრედიტაცია ერთ წლამდე ვადით,” — განაცხადა სპიკერმა შალვა პაპუაშვილმა.

ახალი წესებით: პირველ დარღვევაზე ჟურნალისტს 1 თვით, განმეორებაზე — 1 წლამდე ვადით შეუჩერდება აკრედიტაცია. არსებული სქემა ითვალისწინებდა 1 თვეს პირველ ჯერზე და 6 თვეს განმეორებაზე.

პაპუაშვილი ამ ცვლილებას „ევროპარლამენტის სტანდარტთან” დაახლოებას უწოდებს, ამასთან, განაცხადა, რომ ინტერვიუს წინასწარი შეთანხმების ვალდებულებას ჯერჯერობით არ შემოიღებენ.

ცვლილებების ინიციირებას წინ უძღოდა ის, რომ 22 მაისს პარლამენტმა ვადამდე შეუწყვიტა აკრედიტაცია ონლაინ-გამოცემა „პუბლიკას” და სტუდია „მონიტორს” — ოფიციალური მიზეზი: ათი კვირის განმავლობაში ჟურნალისტების არყოფნა სხდომებზე.