ირანის სასამართლომ ცნობილ მომღერალ პარასტუ აჰმადისა და მისი საკონცერტო გუნდის რვა წევრს 74-ჯერ გამათრახება მიუსაჯა. გადაწყვეტილება 2024 წელს YouTube-ზე პირდაპირ ეთერში გადაცემულ კონცერტს უკავშირდება, სადაც აჰმადი ჰიჯაბის გარეშე გამოვიდა.

The Guardian-ის ინფორმაციით, სასამართლომ არტისტები საზოგადოებრივი ზნეობის შეურაცხყოფისა და ვულგარული და ამორალური შინაარსის გავრცელებაში დამნაშავედ ცნო. სასჯელის ფარგლებში მათ ორი წლით ქვეყნის დატოვებაც აეკრძალათ და ასევე ორი წლით შემოქმედებით საქმიანობაში მონაწილეობა აეკრძალათ. 

2024 წლის დეკემბერში აჰმადიმ პატრიოტული სიმღერა Az Khoone Javanane Vatan ჰიჯაბის გარეშე შეასრულა. ვიდეო სოციალურ ქსელებში ვირუსულად გავრცელდა და YouTube-ზე მილიონობით ნახვა დააგროვა. მომღერალი და რამდენიმე მუსიკოსი მაშინ დროებით დააკავეს, მოგვიანებით კი გაათავისუფლეს.

უფლებადამცველები და იურისტები აცხადებენ, რომ მსგავსი განაჩენები ირანში კულტურული და პოლიტიკური განსხვავებული აზრის ჩახშობის უფრო ფართო კამპანიის ნაწილია. მათი შეფასებით, მათრახით დასჯა არა ლეგიტიმური სასჯელი, არამედ არაადამიანური და ღირსების შემლახავი მოპყრობაა.