პარლამენტის თავმჯდომარე შალვა პაპუაშვილი საქართველოში გერმანიის ელჩ პეტერ ფიშერს განესალამა — თქვა, რომ ელჩი რამდენიმე კვირაში ქვეყანას დატოვებს და პირდაპირ პენსიაზე გავა.

„რაც შეეხება ბატონ პეტერს, ვეტყვი კიდეც — რამდენიმე კვირაში ის დატოვებს საქართველოს. ვიცით, რომ აქედან ის პირდაპირ გადის პენსიაში, რაც კარგია იმ მხრივ, რომ ვეღარ დააზიანებს ვერც ერთ სხვა ერს, როგორც ეს, სამწუხაროდ, შეძლო ქართულ-გერმანული ურთიერთობების შემთხვევაში,” — განაცხადა პაპუაშვილმა.

პაპუაშვილი ასევე შეეხო ფიშერის მტრული განცხადებების საკითხს: „მე უკვე არანაირი ხალისი არ მაქვს ამ ადამიანის მტრულ თავდასხმებზე კომენტარის გაკეთებისა. თუ საჭიროდ ჩათვლის, საგარეო საქმეთა სამინისტრო შეუძლია დაიბაროს და შესაბამისი გასაუბრება გვქონდეს.”

პარლამენტის თავმჯდომარემ შეახსენა, რომ ფიშერი ბერლინიდან კონსულტაციების შემდეგ საქართველოში იმ პირობით დაბრუნდა, რომ „ასეთ თავდასხმებს აღარ ექნებოდა ადგილი”. პაპუაშვილის შეფასებით, ეს პირობა „დარღვეულია”.

„იმედი მაქვს, საგარეო საქმეთა სამინისტროს ექნება სათანადო რეაგირება, როდესაც საქართველოში აკრედიტებული უცხო ქვეყნის წარმომადგენელი ასეთი მტრული თავდასხმებით გამოირჩევა სახელმწიფოს და მისი უმაღლესი პოლიტიკური თანამდებობის პირების მიმართ,” — თქვა მან.

კონტექსტისთვის: ადრე პეტერ ფიშერმა განაცხადა, რომ „შეწუხებულია პაპუაშვილის გამო — მას ან ნამდვილად არ ესმის, რას გულისხმობს ევროპა, ან თავს აჩვენებს, რომ არ ესმის, და არც ერთი კარგი არ არის”.