საქართველოს პარლამენტის თავმჯდომარე შალვა პაპუაშვილი კოპენჰაგენში ქართველ მომიტინგეებთან მოპყრობასთან დაკავშირებით კვლავ სიტყვით გამოვიდა და მოითხოვა, დანიის ხელისუფლებამ ინციდენტი გამოიძიოს.

„ის კადრები, რაც ვიხილეთ, არანაირი კავშირი არ აქვს ადამიანურ მოპყრობასთან. მნიშვნელოვანია, დანიის ხელისუფლებამ გამოიძიოს ეს საქმე და ყველა, ვინც ამ ძალადობაში ჩართული იყო, დაისაჯოს,” — განაცხადა პარლამენტის თავმჯდომარემ.

პაპუაშვილმა ასევე გააკრიტიკა დანიის ხელისუფლების პასუხი, რომლის თანახმად, პოლიციის ჩარევის მიზეზი დიალოგის ჩაშლა გახდა. „ეს, რა თქმა უნდა, დამაკმაყოფილებელი არ არის,” — განაცხადა მან.

პარლამენტის თავმჯდომარემ შეახსენა, რომ დანიას „ძალიან მძიმე მემკვიდრეობა” ჰქონდა ადამიანის უფლებების კუთხით: 1990-იანი წლების ჩათვლით ქვეყანაში სისტემატურად ხდებოდა გრენლანდიის ადგილობრივი მოსახლეობის — მათ შორის 12 წლის გოგონების — მოტყუებით სტერილიზება. „ეს გათანაბრებულია ბევრის მხრიდან გენოციდთან. დღემდე ეს საქმე არ არის გამოძიებული და ჩართული ექიმები კვლავ სამედიცინო პრაქტიკას ეწევიან,” — დასძინა პაპუაშვილმა.

პაპუაშვილი ასევე გამოეხმაურა ოპოზიციის პოზიციას: „ოპოზიციამ განაცხადა — კი, ძალადობა იყო, მაგრამ სამაგიეროდ დანია მდიდარი ქვეყანაა. ეს, მათი წარმოდგენით, ევროპული ღირებულებაა — თუ ხარ მდიდარი, შეიძლება ძალადობა მშვიდობიან მომიტინგეებზე.”