საქართველოს პარლამენტის სპიკერი შალვა პაპუაშვილი 18 მაისს ჩინეთს ეწვია — ეს საქართველოს პარლამენტის თავმჯდომარის პირველი ოფიციალური ვიზიტია ჩინეთში ბოლო 20 წლის განმავლობაში. დელეგაციაში პარლამენტარები ახლდნენ: ვიცე-სპიკერი გიორგი ვოლსკი, დეპუტატები ნინო წილოსანი და სოზარ სუბარი, საგარეო ურთიერთობათა კომიტეტის თავმჯდომარე ნიკოლოზ სამხარაძე და სოფლის მეურნეობის კომიტეტის თავმჯდომარე გელა სამხარაული.

18 მაისს პაპუაშვილი შეხვდა ვანგ ჰიუნინგს — ჩინეთის კომუნისტური პარტიის პოლიტბიუროს მუდმივმოქმედი კომიტეტის წევრს, ჩინეთის სახალხო პოლიტიკური საკონსულტაციო კონფერენციის (CPPCC) თავმჯდომარეს. დასავლური მედია 71 წლის ვანგ ჰიუნინგს პარტიის „მთავარ იდეოლოგად” და სი ძინპინის ერთ-ერთ უახლოეს მრჩევლად მოიხსენიებს.

შეხვედრაზე მხარეებმა ხაზი გაუსვეს 2023 წელს პრემიერ-მინისტრის ვიზიტის ფარგლებში გამოცხადებული სტრატეგიული პარტნიორობის მნიშვნელობას. პაპუაშვილმა განაცხადა, რომ საქართველო და ჩინეთი „ეროვნული სუვერენიტეტის, მშვიდობის დაცვისა და საერთაშორისო სამართლის პრინციპების ერთგულნი არიან”. ჩინელმა მხარემ დაადასტურა საქართველოს სუვერენიტეტისა და ტერიტორიული მთლიანობის მხარდაჭერა, პაპუაშვილმა კი — „ერთი ჩინეთის პრინციპისადმი” საქართველოს ერთგულება.

პაპუაშვილმა ასევე ისაუბრა შუა დერეფნის სტრატეგიულ პოტენციალზე: „გეოპოლიტიკური დაძაბულობის ფონზე შუა დერეფანი ტრადიციული ჩრდილოეთ დერეფნის ყველაზე ეფექტიანი ალტერნატივაა.”

ამავე დღეს პაპუაშვილი შეხვდა ეროვნული სახალხო კონგრესის მუდმივმოქმედი კომიტეტის თავმჯდომარეს ჭაო ლეძის; 19 მაისს კი ჩინეთის საგარეო საქმეთა უნივერსიტეტში მოხსენება წაიკითხა საქართველო-ჩინეთის სტრატეგიული პარტნიორობისა და ეროვნული ინტერესების დაცვის თემაზე.