საქართველოს პარლამენტის თავმჯდომარე შალვა პაპუაშვილი 18 მაისს ჩინეთს ესტუმრა, სადაც ჩინეთის კომუნისტური პარტიის პოლიტიკური ბიუროს მუდმივმოქმედი კომიტეტის წევრს ვანგ ჰიუნინგს შეხვდა. ეს პარლამენტის სპიკერის პირველი ოფიციალური ვიზიტია ჩინეთში ბოლო 20 წლის განმავლობაში.

71 წლის ვანგ ჰიუნინგს დასავლური მედია ხშირად მოიხსენიებს ჩინეთის „იდეოლოგიურ მეფედ” — პრეზიდენტ სი ძინპინის ერთ-ერთ უახლოეს მრჩევლად.

პაპუაშვილს თან ახლდა „ქართული ოცნების” პარლამენტარების დელეგაცია: პირველი მოადგილე გიორგი ვოლსკი, დეპუტატები ნინო წილოსანი და სოზარ სუბარი, ასევე საგარეო ურთიერთობათა კომიტეტის თავმჯდომარე ნიკოლოზ სამხარაძე და სოფლის მეურნეობის კომიტეტის თავმჯდომარე გელა სამხარაული.

შეხვედრაზე ორივე მხარემ ხაზი გაუსვა ბოლო წლებში მიღწეულ „მნიშვნელოვან პროგრესს” ქართულ-ჩინურ ურთიერთობებში. პაპუაშვილმა განაცხადა, რომ „საქართველო და ჩინეთი იზიარებენ ეროვნული სუვერენიტეტის, მშვიდობისა და უსაფრთხოების დაცვის მიმართ ერთგულებას.” ჩინურმა მხარემ კი „დაადასტურა საქართველოს სუვერენიტეტისა და ტერიტორიული მთლიანობისადმი მტკიცე მხარდაჭერა.”

შეხვედრაზე განხილული სფეროები მოიცავდა: ვაჭრობასა და ეკონომიკას, ტურიზმს, განათლებას, ინოვაციებსა და კულტურას. ხაზი გაესვა ჩინეთის „სარტყლისა და გზის ინიციატივაში” საქართველოს მონაწილეობას, ასევე — შუა დერეფნის პოტენციალის სრული ათვისების საჭიროებას.

მოგვიანებით პაპუაშვილი ჩინეთის სახალხო დიდ სახლში (NPC) შეხვდა CPPCC-ის მდივანს ​შუ ბიმინგს; ამ შეხვედრაზე ყურადღება გამახვილდა საპარლამენტო კავშირების განვითარებაზე.