პაკისტანის ბელუჯისტანის პროვინციაში, ქალაქ კვეტასთან, თვითმკვლელმა ტერორისტმა ასაფეთქებელი ნივთიერებებით დატვირთული ავტომობილი ააფეთქა რკინიგზის ლიანდაგთან — სწორედ მაშინ, როდესაც მგზავრთა მატარებელი გადიოდა. Reuters-ი ადგილობრივ ხელისუფლებაზე დაყრდნობით იტყობინება, რომ 24 ადამიანი დაიღუპა, კიდევ 70-ზე მეტი დაშავდა.

მატარებელში ძირითადად პაკისტანის უსაფრთხოების ძალები და მათი ოჯახის წევრები მგზავრობდნენ. ინტერნეტში გავრცელებული ვიდეოებით ჩანს, რომ ორი ვაგონი გადაბრუნდა და ცეცხლი გაუჩნდა. ასევე დაზიანდა მახლობლად გაჩერებული ვაგონები და რამდენიმე სახლი.

პასუხისმგებლობა თავდასხმაზე სეპარატისტულმა დაჯგუფება „ბელუჯისტანის განმათავისუფლებელმა არმიამ” (BLA) იკისრა. ეს ორგანიზაცია, რომელიც ბელუჯისტანის დამოუკიდებლობისთვის იბრძვის, აშშ-ის, დიდი ბრიტანეთისა და ევროკავშირის წევრი ქვეყნების მიერ ტერორისტულ ორგანიზაციად არის გამოცხადებული.

კვეტის სახელმწიფო საავადმყოფოებში საგანგებო მდგომარეობა გამოცხადდა. პრემიერ-მინისტრმა შაჰბაზ შარიფმა თავდასხმა „ტერორისტულ აქტად” შეაფასა და მსხვერპლთა ოჯახებს სამძიმარი გამოუცხადა.

ბელუჯისტანი, რომელიც ავღანეთსა და ირანს ესაზღვრება, პაკისტანის ყველაზე დიდი, მაგრამ ასევე ყველაზე ღარიბი პროვინციაა.