ეუთოს საპარლამენტო ასამბლეამ 8 ივლისს ჰააგის დეკლარაცია და თანმხლები რეზოლუციები მიიღო. დეკლარაცია „სერიოზულ შეშფოთებას“ გამოხატავს საქართველოს „დემოკრატიული უკუსვლის“ გამო, ხოლო კრიტიკული რეზოლუცია საქართველოს მოუწოდებს გაათავისუფლოს „ყველა პოლიტპატიმარი“, გააუქმოს ან გადახედოს „შემზღუდავ კანონმდებლობას“ და დაიწყოს „ნამდვილი რეფორმების განხორციელების პროცესი“.

კენჭისყრის წინ, რომლითაც ეუთოს საპარლამენტო ასამბლეის 33-ე ყოველწლიური სესია დასრულდა, საქართველოს დელეგაციამ, სადავო პარლამენტის საგარეო საქმეთა კომიტეტის თავმჯდომარის, ნიკოლოზ სამხარაძის ხელმძღვანელობით, განაცხადა, რომ პროტესტის ნიშნად კენჭისყრაში მონაწილეობას არ მიიღებდა.

სამხარაძის თქმით, დეკლარაციის „შესწორებული ვერსიის გარკვეული ნაწილები განზრახ ამახინჯებს საქართველოში არსებულ პოლიტიკურ რეალობას, მნიშვნელოვნად არასწორად წარმოაჩენს და აყალბებს ფაქტებს, სრულად უგულებელყოფს სახელმწიფო ინსტიტუტებზე განხორციელებულ ძალადობრივ თავდასხმებს და თვითნებურად განმარტავს არჩევნებზე დაკვირვებისა და მოსკოვის მექანიზმის ანგარიშებს, რაც საფრთხეს უქმნის საქართველოს ეროვნულ ინტერესებს“. გავრცელებული ინფორმაციით, საქართველოს დელეგაციამ სხდომათა დარბაზი პროტესტის ნიშნად დატოვა.

ამ ნაბიჯის საპასუხოდ, ეუთოს საპარლამენტო ასამბლეის პრეზიდენტმა პერე ჟოან პონსმა განაცხადა: „თქვენს ქვეყანაშიც კი ცარიელი ადგილების დატოვება კარგი გადაწყვეტილება არ იყო, თქვენ აქ ზუსტად იგივეს აკეთებთ. ვფიქრობ, პარლამენტში ცარიელი ადგილების დატოვება ყოველთვის ყველაზე ცუდი ვარიანტია, რადგან დემოკრატია, უპირველეს ყოვლისა, გულისხმობს ერთად ყოფნას და კონფლიქტის მოგვარების მცდელობას“.