ქართული ოპოზიციური პარტიების ნაწილმა შიო III-ს 142-ე კათოლიკოს-პატრიარქად არჩევა მიულოცა.

„ძლიერი საქართველო – ლელო” პარტიის განცხადებაში ვკითხულობთ, რომ „ახალი პატრიარქის ხელმძღვანელობით საქართველოს მართლმადიდებელი ეკლესია ღირსეულად გააგრძელებს ამ ისტორიულ მისიას და მნიშვნელოვან როლს შეასრულებს ეროვნული ერთიანობის, საზოგადოებრივი თანხმობის, სულიერი სიმშვიდისა და ქვეყნის სტაბილური განვითარების საქმეში.”

„ჩვენ მტკიცედ გვწამს, რომ ძლიერი და თანამედროვე ქართული სახელმწიფო ეფუძნება დემოკრატიული ინსტიტუტების პატივისცემას, რელიგიური თავისუფლების დაცვასა და სახელმწიფოსა და ეკლესიის ურთიერთპატივისცემაზე დაფუძნებულ თანამშრომლობას, სადაც თითოეული ინსტიტუცია საკუთარი პასუხისმგებლობით ემსახურება ქვეყნისა და საზოგადოების კეთილდღეობას,” — ნათქვამია პარტიის განცხადებაში.

პარტია „გახარია საქართველოსთვის” შიო III-ს „წარმატებას უსურვებს ერის სულიერი გაძლიერების უმნიშვნელოვანეს მისიაში”. „გვჯერა, საქართველოს ეკლესია დარჩება მშვიდობის, თანადგომისა და ეროვნული ერთიანობის საყრდენი,” — ნათქვამია განცხადებაში.

11 მაისს, გაფართოებულ საეკლესიო კრებაზე, საქართველოს 142-ე პატრიარქად სენაკისა და ჩხოროწყუს მიტროპოლიტი შიო (მუჯირი) აირჩიეს. ახალარჩეული პატრიარქის ინტრონიზაცია 12 მაისს, სვეტიცხოველში გაიმართება.

ხელისუფლების წარმომადგენლებმაც — მათ შორის „ქართული ოცნების” ლიდერებმა — ასევე მიულოცეს შიო III-ს. ახალი პატრიარქის არჩევამდე, ეკლესიის საპატრიარქო ტახტს 2024 წლის დეკემბრიდან მოსაყდრის სტატუსით ეს ჩხოროწყუს მიტროპოლიტი ხელმძღვანელობდა — გარდაცვლილი პატრიარქ ილია II-ის ჯანმრთელობის გაუარესების პარალელურად.