აშშ-ის სასამართლო სისტემა უკვე რამდენიმე წელია ცდილობს გადაწყვიტოს, როგორ უნდა მოიქცეს მაშინ, როდესაც სასამართლოში წარმოდგენილი ვიდეოს, ფოტოსა თუ აუდიოჩანაწერის ნამდვილობა ეჭვქვეშ დგება.

15 ოქტომბერს ბოსტონში აშშ-ის ფედერალური სასამართლოების მტკიცებულებათა წესების საკონსულტაციო კომიტეტმა ამ საკითხზე სპეციალური განხილვა გამართა, სადაც OpenAI-ს, Meta-სა და სხვა სფეროს ექსპერტებს მოუსმინეს.

OpenAI-ს წარმომადგენელმა კომიტეტს უთხრა, რომ დღეს არ არსებობს უნივერსალური და სრულად სანდო მეთოდი, რომელიც ნებისმიერ AI-ით შექმნილ მასალას აუცილებლად ამოიცნობს. მისი თქმით, ნაკლებად სავარაუდოა, რომ მომავალში ასეთი უშეცდომო მეთოდი საერთოდ გაჩნდეს.

Meta-ს წარმომადგენლის თქმით კი, თანამედროვე AI-ს უკვე შეუძლია ისეთი ვიდეოსა და აუდიოს შექმნა, რომელიც ნამდვილისგან პრაქტიკულად განურჩეველია. ამასთან, მსგავსი მასალის შექმნა სულ უფრო მარტივი და ხელმისაწვდომი ხდება.

სწორედ ამ პრობლემის გამო კომიტეტი 2023 წლიდან განიხილავს, საჭიროა თუ არა სასამართლო მტკიცებულებების წესებში ცალკე ჩანაწერის დამატება Deepfake-ებისთვის.

ერთ-ერთი შეთავაზებული წესის მიხედვით, თუ სასამართლოში რომელიმე მხარე ამტკიცებს, რომ წარდგენილი ვიდეო, ფოტო ან აუდიო გაყალბებულია, ჯერ მან უნდა წარმოადგინოს ამის დასაბუთებული საფუძველი. ამის შემდეგ მასალის წარმომდგენ მხარეს მოუწევს სასამართლოს დარწმუნება, რომ მტკიცებულება უფრო მეტად ნამდვილია, ვიდრე ხელოვნურად შექმნილი.

ახალი წესი ჯერ მიღებული არ არის. კომიტეტის წევრების ნაწილი მიიჩნევს, რომ AI-სთვის სპეციალური წესის ნაჩქარევად შემოღება შეიძლება არასწორი იყოს, რადგან ტექნოლოგია ძალიან სწრაფად იცვლება, ხოლო ყალბი მტკიცებულების წარდგენა არსებული წესებითაც აკრძალულია. საკითხის შესასწავლად ცალკე სამუშაო ჯგუფიც შეიქმნა.

პრობლემა ამერიკულ სასამართლოებში ჯერჯერობით ფართოდ გავრცელებული არ არის. 931 ფედერალური მოსამართლის გამოკითხვიდან მხოლოდ 15-ს შეხვედრია შემთხვევა, როდესაც ვიდეოს, ფოტოს ან აუდიოს ნამდვილობა Deepfake-ის შესაძლო გამოყენების გამო ეჭვქვეშ დააყენეს.

თუმცა OpenAI-სა და Meta-ს გაფრთხილება იმაზე მიუთითებს, რომ სასამართლოები წინასწარ ემზადებიან გარემოსთვის, სადაც მხოლოდ ვიდეოს ან აუდიოს არსებობა შესაძლოა მისი ნამდვილობის დასადასტურებლად საკმარისი აღარ იყოს.