„საქართველოც ამერიკული ქვეყანაა, რუსეთი დამარცხდა, ანუ ამერიკა ამარცხებს მას“, — განაცხადა პატრიოტთა ალიანსის ერთ-ერთმა ლიდერმა, დავით თარხან-მოურავმა გადაცემა „სტუდია N8-ში“.

მისი თქმით, რუსეთი დასავლეთისა და აშშ-ის მიერ ყველა მიმართულებით არის შევიწროებული, საქართველო კი რეალურად ამერიკული გავლენის ქვეყანაა, რაც საგარეო პოლიტიკის დაგეგმვისას უნდა გავითვალისწინოთ. თარხან-მოურავმა ხაზი გაუსვა, რომ აშშ-მა რუსეთს პოზიციები მეზობელ სომხეთშიც შეუსუსტა, სადაც მოსახლეობა და ბიზნესი მძიმედ არის რუსეთზე დამოკიდებული.

„არსებობს კავშირი რუსეთი-ბელორუსი-ყაზახეთი-სომხეთი. ამ კავშირის მთელი ფულადი ბრუნვის 0.18% საჩუქრად მიდის სომხეთთან — ეს უზარმაზარი თანხაა და სომხეთი დღესაც ამ ფულით ცხოვრობს. სომეხ ბიზნესმენთა 90%-ის ბიზნესი რუსეთს უკავშირდება. ერევანი-მოსკოვის მიმართულებით დღეში 5-7 რეისია“, — განაცხადა მან.

თარხან-მოურავის თქმით, სწორედ ამ პირობებში მარცხდება სომხეთში პრორუსული განწყობები და იმარჯვებს პროამერიკული ფაშინიანი. „ეს იმაზე მეტყველებს, რომ ამერიკა ართმევს რუსეთს სომხეთს. რუსეთი ამერიკამ და დასავლეთმა ყველა მხრიდან შეავიწროვა — გინდა ირანი, სადაც დიდი გავლენა აქვს, გინდა სომხეთი, რომელსაც ახლა ართმევს“, — აღნიშნა მან.

მისივე შეფასებით, ამერიკამ რუსეთი დაამარცხა ვენესუელაში, ლიბიაში, სირიაში, ირანში, სომხეთში, საქართველოსა და აზერბაიჯანში, რითაც კვლავ დადასტურდა, რომ ის მსოფლიოს ყველაზე ძლიერი სახელმწიფოა. „ეკონომიკის ერთი მესამედი მსოფლიოსი ამერიკაა, ამერიკასა და ევროპას მთელი მსოფლიოს ეკონომიკის სულ მცირე 56% ეკუთვნის“, — თქვა მან.

თარხან-მოურავის თქმით, ეს ანალიზი მნიშვნელოვანია, რადგან საქართველომ ურთიერთობა რუსეთთან, ამერიკასთან, ევროპასთან, თურქეთთან, ირანსა და ჩინეთთან გონივრულად უნდა ააგოს. „ასეთი ლანძღვა-გინება და ფურთხება ამერიკის მიმართ არაფერს იძლევა — ეს კატასტროფამდე მიგვიყვანს“, — განაცხადა მან.

პატრიოტთა ალიანსის ლიდერმა ისიც აღნიშნა, რომ საქართველოში დასავლელი პარტნიორების გავლენა და ფინანსური თუ ინსტიტუციური მხარდაჭერა აშკარაა, ხოლო ამ რეალობის უარყოფა თვითმოტყუება იქნებოდა. „ყველა სახელმწიფო უწყებაში ზის აშშ-ის წარმომადგენელი. ამერიკა დღესაც ეხმარება საქართველოს — ფულითაც და უამრავი სხვა ბერკეტითაც“, — დასძინა მან.