საქართველოში ირანის ისლამური რესპუბლიკის ელჩმა, სეიედ ალი მოჯანიმ განაცხადა, რომ „თავისი მრავალსაუკუნოვანი ისტორიის განმავლობაში ირანს არასოდეს განუხორციელებია აგრესია მეზობელი ქვეყნების ტერიტორიის წინააღმდეგ“. ელჩმა ექვსთვიანი მოღვაწეობის შედეგები სოციალურ ქსელში გამოქვეყნებულ ვრცელ პოსტში შეაჯამა და ამავე თემაზე პრესკონფერენცია გამართა.

სოციალურ ქსელში გავრცელებულ ტექსტში ელჩი წერს, რომ დიპლომატიური არხებით მეზობელი ქვეყნების, მათ შორის საქართველოს, პასუხისმგებელ პირებს გადაეცათ დეტალური ინფორმაცია ირანის მოწინააღმდეგე ძალების — აშშ-ისა და ისრაელის — სამხედრო მოქმედებების შესახებ.

„დღევანდელი ირანი საკუთარ ეროვნულ ძალას ეყრდნობა. ირანის ისლამურ რესპუბლიკას არც ჰქონია და არც აქვს იმპერიად ქცევის სურვილი. ჩემი ქვეყანა წარმოადგენს რესპუბლიკას, რომელიც ხალხის პირდაპირ ნებას ეფუძნება და საარჩევნო პროცესებისა და კონსტიტუციური ჩარჩოს ფარგლებში გააგრძელებს საკუთარ გზას“, — წერს ელჩი.

პრესკონფერენციაზე ჟურნალისტებმა ელჩს ამერიკის სენატში „კავკასიაში ჩინეთის გავლენის წინააღმდეგ ბრძოლის აქტის“ დამტკიცებაზე ჰკითხეს. მოჯანის თქმით, ერთი კონგრესმენის პოზიცია ვერ დააზარალებს სხვა ქვეყნის მილიარდიან მოსახლეობას. „დოკუმენტი ფაქტობრივად ინიცირებული იყო კალიფორნიის წარმომადგენელ უილსონის მიერ, რომელიც 211 514 ხმით გახდა კონგრესის წევრი. ჩემი რჩევა მისთვის იქნებოდა, რომ ეს ხმები შეინარჩუნოს. მთლიანად კონგრესსაც ნაკლებად შესწევს უნარი, დაბრკოლება შეუქმნას ისეთ მძლავრ ეკონომიკურ გავლენას, როგორიც ჩინეთია“, — განაცხადა მან („ტვ პირველის“ თარგმანი).

ჟურნალისტებმა ისიც იკითხეს, რატომ არ დაუჭირა ირანმა მხარი გაეროს რეზოლუციას საქართველოს ოკუპირებული რეგიონებიდან იძულებით გადაადგილებულ პირთა და ლტოლვილთა სტატუსის შესახებ. „ჩვენ ყოველთვის ვუჭერთ მხარს საქართველოს სუვერენიტეტსა და ტერიტორიულ მთლიანობას“, — განაცხადა ელჩმა და დასძინა, რომ ირანს ამ რეზოლუციის კენჭისყრაში მონაწილეობა საერთოდ არ მიუღია, რაც მხარის არდაჭერისგან განსხვავდება. „თავის შეკავებაც პოზიციის დაფიქსირებაა. ქართული მხარეც გარკვეულ რეზოლუციებს არ ესწრება და კენჭისყრაში არ მონაწილეობს. ანალოგიურად ვიქცევით ჩვენც. არის ნაცვალგების პრინციპი“, — აღნიშნა მან.

მოჯანის თქმით, რეზოლუციას ისრაელმაც არ დაუჭირა მხარი: „ისრაელი ვერ დაუჭერდა მხარს, რადგან ეს მის პოლიტიკას ეწინააღმდეგება, რომელიც პალესტინელ ლტოლვილებს ეხება. ისრაელის პოლიტიკაში ყოველთვის არის ორმაგი სტანდარტი“. ელჩმა აღნიშნა, რომ ირანი ქართველ ლტოლვილებს როგორც აფხაზეთიდან, ისე ცხინვალის რეგიონიდან ყოველთვის ეხმარებოდა. „ვამაყობ იმით, რომ საბჭოთა პერიოდში გორში ძლიერი მიწისძვრის დროს ირანელმა ხალხმა 140 ათასი ტონა ბრინჯი მიაწოდა ჰუმანიტარული დახმარების სახით. ჩემმა წინამორბედმა ირანელი დიპლომატები 2008 წელს თბილისიდან გორში ჩაიყვანა, რათა გორის ოკუპაცია არ მომხდარიყო“, — განაცხადა მან. „ისრაელის ელჩისგან განსხვავებით, არასდროს ჩავერევი საქართველოს შიდა საკითხებში“, — დასძინა ელჩმა.

მოჯანმა ისრაელის ელჩი გააკრიტიკა, რომელიც, მისი თქმით, ქართულ მხარეს „მუქარის ენით ესაუბრება“. „როდესაც თბილისის მერიამ ანძა ირანის დროშის ფერებში გაანათა, ჩვენც, 26 მაისს თეირანში 435-მეტრიანი კოშკის ფონზე საქართველოს დროშა გამოვსახეთ. ისრაელში იყო 26 მაისს საქართველოს დროშის განათება?!“, — განაცხადა ელჩმა. ცნობისთვის, გაეროს გენერალური ასამბლეის მე-80 სესიაზე მიღებულ რეზოლუციას აფხაზეთიდან და ცხინვალის რეგიონიდან იძულებით გადაადგილებულ პირთა და ლტოლვილთა სტატუსის შესახებ, საქართველოს საგარეო საქმეთა სამინისტროს ცნობით, 107-მა ქვეყანამ დაუჭირა მხარი, წინააღმდეგ კი 8 ქვეყანა, მათ შორის ირანი, წავიდა.

მოჯანიმ მკვეთრად გააკრიტიკა ჰადსონის ინსტიტუტის კვლევა, რომელიც საქართველოში ირანის მზარდ გავლენას ეხება. მისი თქმით, ანგარიშის ერთ-ერთი თანაავტორი, ლუკ კოფი, ყოფილი სამხედრო მზვერავია და კავკასიის შესახებ მისი არანაირი ნაშრომი არ მოიძებნება. „შემაშფოთებელია, რომ ამერიკა თავისი სამხედრო-სადაზვერვო სამსახურის ყოფილი ან მოქმედი წარმომადგენლებით ცდილობს კავკასიის თემებზე მუშაობას. ისინი ერთ პერიოდში ავღანეთზე მუშაობდნენ, ახლა კი ლოკაცია შეცვალეს და საქართველოზე გადმოერთნენ“, — განაცხადა მან.

ელჩის შეფასებით, ჰადსონის ცენტრი და სხვა ამერიკული ანალიტიკური ცენტრები დაინტერესებული არიან, რომ საქართველოსგან „გარკვეული პოლიტიკური ხარკი მიიღონ“. მან ასევე აღნიშნა, რომ ანგარიშის ერთ-ერთი თანაავტორის, გიორგი კანდელაკის, ისევე როგორც თინა ხიდაშელის წინააღმდეგ საქმე აღძრულია.

ალ-მუსტაფას უნივერსიტეტთან დაკავშირებულ კითხვაზე ელჩმა განაცხადა, რომ ეს „უდიდესი თეოლოგიური სასწავლებელია ირანში, სადაც დაახლოებით 100-მდე საგანი ისწავლება“, ხოლო მის საქართველოში ყოფნასთან დაკავშირებულ „ჭორებს ირაკლი კობახიძემ გასცა პასუხი“.

შეგახსენებთ, კვლევა სახელწოდებით „საქართველოს ირანისკენ შემობრუნება: თეირანის გავლენის სწრაფი გაფართოება ოდესღაც აშშ-ის ერთგულ მოკავშირეზე“ საქართველოში ირანის მზარდ გავლენას ეხება და მისი თანაავტორები არიან ჰადსონის ინსტიტუტის უფროსი მეცნიერ-თანამშრომელი ლუკ კოფი და საბჭოთა წარსულის კვლევის ლაბორატორიის პროექტების მენეჯერი გიორგი კანდელაკი. კვლევას საქართველოში მწვავე რეაქცია მოჰყვა — სუს-მა გამოძიება სისხლის სამართლის კოდექსის 319-ე მუხლით დაიწყო, რაც უცხო ქვეყნისთვის ან უცხოეთის კონტროლს დაქვემდებარებული ორგანიზაციისთვის მტრულ საქმიანობაში დახმარებას გულისხმობს.