ოკუპირებული აფხაზეთის დე ფაქტო პროკურატურის ინფორმაციით, საქართველოს მოქალაქის, გელა მებონიას წინააღმდეგ სისხლის სამართლის საქმე აღიძრა ე.წ. სახელმწიფო საზღვრის უკანონოდ კვეთის ბრალდებით. ინფორმაციას Apsadgil.info ავრცელებს.

უწყების ცნობით, საქმე 3 ივლისს აღიძრა. მათივე მტკიცებით, გელა მებონიამ 2 ივლისს, გალის რაიონის სოფელ ბატაიგუარასთან, საქართველოს მხრიდან ოკუპირებული აფხაზეთის ე.წ. სახელმწიფო საზღვარი უკანონოდ გადაკვეთა.

Apsadgil.info-ის ინფორმაციით, 6 ივლისს გალის რაიონის დე ფაქტო სასამართლომ გელა მებონიას აღკვეთის ღონისძიების სახით წინასწარი პატიმრობა შეუფარდა, რომელიც წინასწარი გამოძიების დასრულებამდე იმოქმედებს.

ინფორმაცია ოკუპირებული აფხაზეთის დე ფაქტო გენერალური პროკურატურის პრესსამსახურზე დაყრდნობით ვრცელდება.