„ოცნებაში” ვითარება იმაზე მძიმეა, ვიდრე გარედან ჩანს — ასე აფასებს მმართველი გუნდის შიდა მდგომარეობას პოლიტიკური ანალიტიკოსი გოჩა მირცხულავა სოციალური ქსელის პოსტში.

მირცხულავას თქმით, მაისის დასაწყისიდან „ქართული ოცნების” ელიტაში სიტუაცია „ძალიან აიჭრა”. ანალიტიკოსი ასახელებს სამ ძირითად გამოწვევას, რომლებზეც მმართველი გუნდი ერთდროულად მუშაობს: ზოგი საერთო ინტერესისაა, ზოგი — შიდა კლანური.

ფინანსური ზეწოლის ახალი ტალღა, მირცხულავას დახასიათებით, სამ მიზანს ემსახურება: ბიუჯეტში დამატებითი სახსრების მოზიდვას, „შავი სალაროს” შემოსავლის შენარჩუნებას და ოპოზიციისთვის ბიზნეს-დაფინანსების გამორიცხვას — განსაკუთრებით ყოფილი „ნაციონალური მოძრაობის” ბიზნესმენთა მხრიდან.

ამ ამოცანებისთვის, ანალიტიკოსის ცნობით, შემოსავლების სამსახური ახლებური ინტენსივობით ჩართდება: მაღალი ჯარიმებისა და „დანაშაულის ნიშნების” გამოვლენის ჩათვლით. ძირითადი სამიზნე სეგმენტი — ენერგეტიკული, მეღვინეობის, სამედიცინო და საამშენებლო ბიზნესი, ასევე მცირე ბიზნესი ზოგადად.

მირცხულავა ახსენებს სვანეთში „მაინინგის” თემასაც, რომელსაც „კლანური გადანაწილების” ელფერი ასდევს. ანალიტიკოსი ასევე ეხება „დალაგებულ” ყოფილ ნაც-ბიზნესმენთა ახალ სიას, რომელიც მაისში შედგა. „ვინც ახლა „თევზივით წყალში” გრძნობს თავს, მალე ნაპირზე ამოაგდებენ,” — წერს ის.

„ამ დროისთვის დაახლოებით 25-მდე ასეთ ბიზნესმენზეა საუბარი,” — ამბობს ანალიტიკოსი, რომელიც ამ სახელებს კონკრეტულად არ ასახელებს.