ოპოზიციის ლიდერი და პოლიტიკური პატიმარი ნიკა მელია ციხიდან საგანგებო განცხადებას ავრცელებს, რომელშიც მიხეილ სააკაშვილს ღიად უპირისპირდება.

მელიამ განაცხადა, რომ სააკაშვილი „კვლავაც უადგილო ადგილას ჩაიწყვიტა თოკი.” მისი თქმით, ყოფილი პრეზიდენტის საქართველოში ჩამოსვლის ნამდვილი მიზეზი „დაუძლეველი ეჭვიანობა” იყო — ვინაიდან სააკაშვილს „ის კაციც” და სხვებიც ეუბნებოდნენ, რომ თუ ის არ ჩამოვა, მელია პარტიას წაართმევდა.

„ჰოდა, ვამჟღავნებ ამ წერილში ჩემ საიდუმლოდ ნალოლიავებ პოზიციას, რითაც იხსნება მისი ბოღმის შადრევნის ამოხეთქვები. რას ვიზამთ, მან კვლავაც ძალიან უადგილო ადგილას ჩაიწყვიტა თოკი”, — წერს მელია.

მისი განმარტებით, 2021–2022 წლებში ოპოზიციური ერთობა უპრეცედენტო იყო, ხოლო პარტიას „მსხვილი დონორი” გაუჩნდა — ეს ყველაფერი სააკაშვილის ეჭვიანობას „საშინლად აძლიერებდა.” შედეგად, „უნიკალური, ძალიან პერსპექტიული პოლიტიკური პროცესი ფერფლად გადაიქცა.”

„ვინც ზურგიდან დანის ჩარტყმაში გამოცდილი მყავს, იმ კაცთან ნურავინ მთხოვს ერთობაში ყოფნას, რამდენადაც ჩემთვის პატივცემული ადამიანებიც არ უნდა იყვნენ ამა თუ იმ პლატფორმაზე”, — აცხადებს ოპოზიციის ლიდერი.

მელია პირდაპირ ანგარიშს უხდის: „სადაც სააკაშვილია, იქ ქვეყნის ინტერესი არაა, იქ მხოლოდ კერძო ეგოისტური ინტერესია. ვიყო ივანიშვილის მტერი არ ნიშნავს, რომ უნდა ვიყო სააკაშვილის პარტნიორი. დანარჩენს მომავალი გვაჩვენებს!”

ამასთანავე, მელია ხაზს უსვამს, რომ „ქართული ოცნების ცვლილება ვერასოდეს იქნება სიყალბე, ფლიდობა, ქვებუდანობა, ღალატი და ღალატის ღირსებად გასაღების მცდელობა.”